न्यूज टुडे
राजविराज, ०७ असार ।
लालपुर्जा माग गर्दै नगरपालिकाको कार्यलयमा तालाबन्दी गरी रिले अनशनसहित संघर्षरत राजविराज नगरबासीको आन्दोलनमा प्रहरीले हस्तक्षेप गरेपछि विभिन्न स्वरुपको आन्दोलनलाई निरन्तरता दिदै टाउकोमा रातो फेटा बाँधेर विरोध प्रदर्शन गरिएको छ । प्रहरीले नगरपालिकामा लगाइएको ताल्चा फुटाएरर रिले अनशनमा बसेका नगरबासीमाथि अन्धाधुन्ध लाठीचार्ज गरि हटाएपछि आक्रोशित नगरबासीले सोमबार टाउकोमा रातोफेटा बाँधेर विरोध प्रदर्शन गरेको हो ।
प्रहरी दमन विरुद्ध अर्धनग्न विरोध प्रदर्शन गरेका नगरबासीले १३ औं दिन सोमबार टाउकोमा रातो फेटा बाँधेर विरोध प्रदर्शन गरेका छन् । शान्तिपूर्ण आन्दोलनमा प्रहरीले हस्तक्षेप गरेको भन्दै आन्दोलनरत नगरपालिकाबासीहरुले ‘हामी चुप छौ, कमजोर होइन’ भन्दै विरोध प्रदर्शन गरे ।
लालपुर्जा माग गर्दै विभिन्न स्वरुपको आन्दोलनलाई निरन्तरता दिदै आएका नगरपालिकाबासीको आन्दोलनले महिनौं दिनसम्म निरन्तरता पाएको छ ।। प्रहरीको बाक्लो उपस्थितिमा नगरपालिका कार्यालयमा लगाइएको ताल्चा फुटाइए पछी उनीहरुले आन्दोलनलाई थप सशक्त बनाएको छ ।
व्यनर सहित सडक संघर्षमा सहभागी नगरबासीहरुले प्रहरी दमनको कडा शब्दमा विरोध गर्दै बक्ताहरुले लालपुर्जा पाउने सुनिश्चितता नभएसम्म आन्दोलन नरोकिने चेतावनी दिए ।
उनीहरुले राजविराज शहरको स्थापना कालदेखि नेपाल सरकारबाट प्रदान गरिएको विटौरी जग्गामा बसोबास गर्दै आएकोले निशर्त लालपुर्जा पाउनु पर्ने माग सारेका छन् ।
नगरबासीले हकभोगको आधारमा जग्गको स्वमित्व पाउनु पर्ने माग सार्दै महीना दिन बढी देखि जारी संघर्षका कार्यक्रमलाई दबाउने प्रयास भए थप सशक्त आन्दोलन गर्ने चेतावनी दिए ।
उनीहरुले विटौरी जग्गाको राजस्व राजविराज नगरपालिकामा बुझाउँदा समेत लालपुर्जा वितरणमा बेवास्ता गरेको भन्दै आक्रोश पोखे । शान्तिपूर्ण संघर्षबाट सुनुवाइ नभए आन्दोलनलाई थप सशक्त बनाउन बाध्य हुने उनीहरुले बताए ।
१९९८ सालदेखि बसोबास गर्दै आएको नगरबासीलाई पटकपटक आश्वासन दिएपनि हालसम्म लालपुर्जा वितरण नगरेको नगरबासीको गुनासो छ। हकभोगको आधारमा जग्गाको लालपुर्जा उपलब्ध गराउनुपर्ने एक सूत्रीय माग राखी डेढ देखि विभिन्न स्वरुपको चरणबद्व दवावमुलक कार्यक्रम गर्दै आएपनि सरकारले गरेको दवाउने प्रयास सफल हुन नदिने आन्दोलन परिचालन समितिका संयोजक खेलानन्द दासले बताए ।
नगरपालिकाले विटौरी कर लिदै आएपनि लालपुर्जा वितरणमा चासो नदिएको स्थानीयको आरोप छ । २०२८ सालमा राजविराज शहरको ६० विघा जग्गालाई नापी शाखाले गाउँ ब्लक दावी गर्दै श्रेस्ता कायम गरिएकोले त्यसलाई आधार मान्ने हो भनेपनि जग्गाको लालपुर्जा पाउनुपर्ने आन्दोलनकारीहरुको भनाइ छ ।
नगरपालिकामा कर बुझाएर बैंकमा जग्गा धितो राखी कारोबार हुँदै आएकोमा पछिल्लो समय विटौरी जगाको लालपुर्जा उपलब्ध गराउने भनी सरकारले बैंकलाई देशव्यापी पत्राचार गरेपछि बैंकले धितो बन्धक राख्न रोक लगाएको थियो ।
आन्दोलनरत नगरबासीको आन्दोलनलाई सप्तरी उधोग बाणिज्य संघलगायतका दर्जनौं संघसंस्था तथा राजनीतिक दलहरुले प्रेस विज्ञप्ति जारी गर्दै तथा आन्दोलनमा भौतिक उपस्तिथि जनाएर एक्यवद्धता जनाएको छ । पाँच हजारभन्दा बढी परिवारले हकभोग गर्दै आएको विटौरी जग्गाको लालपुर्जा उपलब्ध गराउन नागरिक स्तरबाट समेत दवाव बढेको छ ।
राजविराज नगरपालिका अन्तर्गत १० विघे ब्लक जग्गाको भने यसअघि नापी शाखाको सिफारिसमा मालपोत कार्यालयबाट जग्गाधनी पूर्जा वितरण गरेको छ ।
रास्वपाका वरिष्ठ नेता बालेन्द्र शाह नेतृत्वको सरकारले सार्वजनिक जग्गा खाली गर्न देशव्यापी उर्दी जारी गरेपछि राजविराजबासी थप सशंकित भएका छन् ।
