न्यूज टुडे
राजविराज,१७ बैशाख ।
सप्तरीको अग्नीसाइर कृष्णासवन गाउँपालिका २ स्थित बनदेवी सामुदायिक वनको कुसुम डाँडामा आइतबार विपसना ध्यानकेन्द्र स्थापना गरिएको छ । धम्मा श्रवण बुद्ध विहार व्यवस्थापन समिति भुर्की सितापुरद्वारा आयोजित एक समारोहका वीच विपसना ध्यानकेन्द्र स्थापना गरिएको हो ।
आयोजक समितिका अध्यक्ष छोटेलाल चौधरीको अध्यक्षता तथा भिक्षु प्रज्ञारत्नको प्रमुख आतिथ्यमा आयोजित एक कार्यक्रमको वीच शान्तिको झण्डा फहराएर तथा बृक्षरोपण गरेर ध्यानकेन्द्र स्थापना गरिएको थियो ।
‘रुख रोपौ, वन जोगाऔं’ भन्ने मुल नाराकासाथ आयोजित कार्यक्रममा सामुदायिक बन उपभोक्ता समितिका अध्यक्ष रामपूजन चौधरी र धम्म श्रवण बुद्ध विहार व्यवस्थापन समितिका अध्यक्ष चौधरीले संयुक्त रुपमा बृक्षरोपण गरि बुद्ध विहार तथा विपसना ध्यान केन्द्रको स्थापना गरे ।
कार्यक्रममा धर्मोदयसभा सप्तरीका अध्यक्ष महेश कुमार चौधरी, उपाध्यक्ष माहावीर प्रसाद चौधरी,स्थानीय युवा नेता राम कुमार यादव, अनिल मगर, विमला तामाङ, स्थानीय बुद्धिजीवीहरु बम बहादुर राउत, बाबुराम थापा, निरमाया बल, लिला योन्जन, गणेश मगर, विशाल थापा, खुशी तामाङ, समितिका पदाधिकारीहरु लगायत स्थानीय समाजसेवीहरुको उपस्थिति थियो ।
त्रीशरण पञ्चशील धारण, बुद्ध पूजा, परित्राण, विपसना ध्यान र दान प्रधान तथा पुण्य अनुमोदन गरि कार्यक्रम समापन गरिएको थियो ।
उक्त अवसरमा भिक्षुकुटी निर्माणका लागि स्थानीय निरमाया बल तामाङले ५० हजार रुपैयाँ सहयोग समेत गरेकी थिइन् ।
