न्यूज टुडे
राजविराज, ०५ जेठ ।
समाचार लेखेको विषयलाई लिएर आपत्तिजनक शब्दको प्रयोग गरी सामाजिक संजालमा पोष्ट गरेको सामाग्री सन्तोष कुमार चमनले हटाएपछि पत्रकार कृष्ण कुमार मण्डलसंग भएको विवाद टुङ्गिएको छ । नेपाल पत्रकार महासंघ सप्तरीका कार्यसमिति पदाधिकारीको रोहवरमा शाखा कार्यालयमा सोमबार दुबैजनालाई राखी छलफल गरि विवाद टुग्ङ्गो लगाएको हो ।
चमनले गल्ती स्वीकार गर्दै आत्मालोचना गरि आफ्नो व्यक्तिगत फेसबुक आइडिमा पोष्ट गरिएको सामाग्री हटाउने सहमतिपछि विवाद टुङ्गिएको नेपाल पत्रकार महासंघ सप्तरीका अध्यक्ष श्रवण कुमार देवले जानकारी दिए ।
नेपाल पत्रकार महासंघ शाखा कार्यसमितिको बैठकबसी विवाद निरुपणका लागि आपसी सहमतिबाट समाधान खोज्ने निर्णय अनुसार विवाद टुङ्ग्याएको उनले जानकारी दिए ।
लेखापढी व्यवसायी प्रमाणपत्रका लागि सप्तरी जिल्ला बार एकाईलाले निर्धारित शुल्क भन्दा ५ हजार रुपैया आवेदनबापत गैरकानुनी असुल गरेको भिडियो र समाचार पत्रकार मण्डलले आफ्नो अनलाइनबाट प्रशारण गरेका थिए । बारकी कोषाध्यक्ष निलम कुमारी यादवले गैरकानुनी असुलीको बचाउ गर्दै चमनले मण्डलको नामै किटेर धम्कीपुर्ण आपत्तिजनक अपशब्द प्रयोग गरि फेसबुकमा पोष्ट गरेपछि विवाद उत्कर्षमा पुगेको थियो ।
नेपाल आदिवासी जनजाति पत्रकार महासंघ( फोनिज) सप्तरीका अध्यक्ष एवम् नेपाल पत्रकार महासंघ सप्तरीका कार्यबाहक सचिब समेत रहेका मण्डललाई समाचार लेखेकै निहुँमा धम्कीपुर्ण अपशब्दको निन्दा गर्दै आधादर्जनबढी संघसंस्थाले आपत्ति जनाएका थिए ।