न्यूज टुडे
राजविराज,१० बैशाख ।
राष्ट्रियसभा सदस्य रञ्जित कर्णले आफूविरुद्ध प्रकाशित भ्रामक र असत्य समाचारप्रति आपत्ति जनाउँदै साइबर ब्युरोमा उजुरी दिएका छन्। केही सञ्चारमाध्यम र सामाजिक सञ्जालमा आफूले नबोलेका कुरा तोडमोड गरी प्रस्तुत गरिएको आरोप लगाउँदै उनले उजुरी दर्ता गराएका हुन् ।
सञ्चारकर्मीहरूसँग कुरा गर्दै उनले नेपाली कांग्रेस प्रेस स्वतन्त्रतामा विश्वास गर्ने पार्टी भएको र आफू पनि त्यसप्रति प्रतिबद्ध रहेको बताए। तर गलत सूचना फैलाएर व्यक्तिको चरित्र हत्या गर्नु प्रेस स्वतन्त्रता नभएको उनको भनाइ थियो। “प्रेस स्वतन्त्रता भनेको जिम्मेवारीसहितको स्वतन्त्रता हो,” उनले भने
उनले प्रधानमन्त्रीसँग सोधेको प्रश्नलाई पनि तोडमोड गरेर आफूविरुद्ध भ्रम फैलाइएको दाबी गरे। आफूले केवल समान कानुनी मापदण्डबारे प्रश्न उठाएको स्पष्ट पार्दै ‘बालुवाटार जलाउने धम्की’ दिएको भन्ने आरोप असत्य भएको बताए। यदि त्यस्तो प्रमाण भए कानुनी कारबाही भोग्न तयार रहेको उनले चुनौती दिए ।
कर्णले तथ्यहीन र उद्देश्यप्रेरित सामग्रीले लोकतन्त्रलाई कमजोर बनाउने भन्दै सञ्चारमाध्यमलाई सन्तुलित र सत्य सूचना प्रवाह गर्न आग्रह गरे। उनले लोकतन्त्रमा प्रेस स्वतन्त्रता आवश्यक भए पनि जिम्मेवार पत्रकारिता अपरिहार्य रहेको बताए।
