रामनाथ यादव
राजविराज, ०५ बैशाख ।
जनता समाजवादी पार्टी नेपालका अध्यक्ष एवम् पूर्व उपप्रधानमन्त्री उपेन्द्र यादवले देशको विकास र समृद्धिका लागि गुणस्तरीय शिक्षा अपरिहार्य रहेको बताएका छन् । सप्तरीको तिलाठी कोइलाडी गाउँपालिका ७ स्थित रहेको मावि बभनगामाकट्टीद्वारा शुक्रबार आयोजित अमृत महोत्सवलाई सम्बोधन गर्दै उनले यस्तो बताएका हुन् ।
कार्यक्रमलाई सम्बोधन गर्दै अध्यक्ष यादवले शिक्षामा सुधार नआउँदा देशको अपेक्षित विकास हुन नसकेको बताए । उनले काँग्रेस-कम्युनिस्टको शासन कालमा देशको शैक्षिक अवस्था ध्वस्त भएको टिप्पणी गरे ।
बढ्दो व्यापारीकरणले शिक्षाको साख घटेको उल्लेख गर्दै उनले शिक्षा क्ष्रेत्रमा सुधार ल्याउन सामुदायिक विद्यालयहरुमा गुणस्तरीय शिक्षा अपरिहार्य रहेको बताए ।
शिक्षालाई निजीकरण गर्ने नीतिका कारण सामुदायिक विद्यालयको शैक्षिक गतिविधि लथालिङ्ग हुन पुगेको अध्यक्ष यादवको भनाइ थियो ।
उनले विकास र समृद्धिको आधार शिक्षा भएकोले मर्यादित, प्रविधिमैत्री तथा गुणस्तरीय शिक्षा आजको आवश्यकता भएको उल्लेख गरे ।
‘अहिलेको शिक्षाको कुनै महत्त्व छैन, यसले दक्ष जनशक्ति उत्पादन गर्न सक्दैन, अध्यक्ष यादवले भने, संसारमा काम नलाग्ने शिक्षाको कुनै अर्थ हुदैन, सबै ठाउँमा विक्ने र टिक्ने शिक्षा आवश्यक छ तर अहिलेकै शैक्षिक प्रणालीबाट गुणस्तरीय, मर्यादित र रोजगारीमुलक शिक्षाको परिकल्पना गर्न सकिनँ ।’
उनले समृद्ध राष्ट्र निर्माणका लागि प्रविधिमैत्री, मर्यादित, गुणस्तरीय तथा सम्मुन्नत नैतिक क्षिक्षामा जोड दिए ।
निजीकरण नहुँदाको शिक्षाको महत्त्वको बारे चर्चा गर्दै पूर्व उपप्रधानमन्त्री समेत रहेका अध्यक्ष यादवले सामुदायिक विद्यालयको शिक्षा सुधारका लागि विद्यालय शिक्षा नीतिमा परिवर्तन गर्नु जरुरी रहेको बताए ।
अध्यक्ष यादवले ठुलो दुइदल नेतृत्वको सरकार असफल भएको बताए । उनले केपी ओली नेतृत्वको सरकारले देशमा सुशासन कायम गर्न नसकेको, जनताको जीउ ज्यानको रक्षा गर्न नसकेको र भ्रष्टाचारीको संरक्षण मात्र गरेको आरोप लगाए । यादवले एमाले-काँग्रेस नेतृत्वको सरकारले वडादेखी प्रधानमन्त्री कार्यालयसम्म भ्रष्टाचार संगठित रुपमा संस्थागत गरेको टिप्पणी गरे । अहिलेकाे सरकारले शिक्षा , स्वास्थ्यलाई व्यापारीकरण गरी धन्धा वनाएकाेले मुलकमा शिक्षा ध्वस्त भएको उनको कथन थियो ।
युग अनुसार शिक्षा नीति परिवर्तन गरि आधुनिक शिक्षा लागू गरी शिक्षाको स्तर माथि उठाउनु पर्ने धारणा राख्दै उनले राज्यले शिक्षा प्रति ध्यान नदिएको भन्दै आक्रोश पाेखे ।