न्यूज टुडे
राजविराज, ०४ साउन ।
सप्तरीको राजविराज नगरपालिका– ३ का वडासदस्य सिद्धार्थ तातेड पक्राउ परेको छ। सहकारी ठगीको आरोप लागेका उनलाई सप्तरी प्रहरीले बिहीबार पक्राउ गरेको हो।
राजविराजस्थित कान्तिपुर बहुउद्देश्यीय सहकारी संस्थाका सचिव रहेका तातेडले बचतकर्ताको रकम हिनामिना गरेको आरोप छ।
बचतकर्ताहरूको रकम फिर्ता नगरेपछि ४५ जना बचतकर्ताले तातेड विरुद्ध जिल्ला प्रहरी कार्यालय सप्तरीमा उजुरी दिएका थिए। प्रहरीले घटनाको अनुसन्धान गरी तातेडसहित सातजनालाई प्रतिवादी बनाएर २०८० साउन १९ गते नै मुद्दा दर्ता गरेको थियो।
त्यसको एक वर्षपछि उनी पक्राउ परेका हुन्। अन्य ६ जना अझै फरार छन्। पक्राउ परेका तातेडका सम्बन्धनमा अनुसन्धान गर्न सप्तरी जिल्ला अदालतबाट शुक्रबार म्याद लिइएको सप्तरीका प्रहरी प्रबक्ता प्रहरी नायव उपरीक्षक ढुण्डिराज नेउपानेले जानकारी दिए ।
