न्यूज टुडे
राजविराज, ०१ साउन।
नेकपा माओवादी केन्द्रका नेता एवम् पुर्व सिंचाइ मन्त्री उमेश कुमार यादवले राजबिराज नगरपालिकाले सिसि क्यामारामा घोटाला गरेको दाबी गरेका छन् । आफ्नो फेसबुक पेजमा मंगलबार स्टाटस लेखेर सार्वजनिक गर्दै मन्त्री यादवले यस्तो खुलासा गरेका हुन् ।
पुर्व मन्त्री यादवले राजविराज नगरपालिकाले प्रक्रिया मिचेर मनपर्दी सिसि क्यामरा खरिद गरी जडान गरेको आरोप लगाउँदै जवाफ समेत मागेका छन् ।
“कति वटा सिसि क्यामेरा जडान गर्यो ? कति बजेट खर्च भयो ? “, यादवले सामाजिक संजालमा लेखेका छन्, “खरिद प्रकृतिको समान टेन्डर मार्फत नगरी उपभोक्ता समिति मार्फत किन खर्च गर्यो ? जवाफ पाइन्छ कि ? ।”
सिसि क्यामरा खरिद टेन्डर मार्फत गर्नुपर्नेमा उपभोक्ता समिति मार्फत गर्नु अस्वभाविक रहेको उनको टिप्पणी थियो ।
राजविराज नगरपालिकाले विजुलीको सामान खरिद नै नगरी लाखौं भुक्तानी दिएको भन्दै त्यसो गर्नुको कारण खुलाउन मन्त्री यादवले आग्रह समेत गरेको छ ।
“चालिस लाख बराबरको बिजुलीबतीको समान टेन्डर नगरी १०/१० लाखको टुक्राटुक्रा गरेर कोटेशनमा नै किन दिनुपर्यो ?”, उनले लेखेका छन् ,”त्यो पनि खरिद नै नगरी भुक्तानी कसरी दिइयो ? । “
उनले विजुलीको समान खरिद आदेश विनै भुक्तानी गर्नु कानुन विपरीत भएको दावी गरेका छन् ।
पुर्व मन्त्री यादवले नगरपालिकामा संचालन गरेको पुर्वाधार विकास तथा कार्यक्रम पारदर्शी गर्नुपर्नेमा जोड दिदै सार्वजनिक गर्न चुनौती समेत दिएका छन् ।
“टेन्डर / कोटेशन / संघसंस्था मार्फत गरिएको कार्यक्रमहरु बारेमा सार्वजनिक ( सामाजिक संजाल मार्फत समेत ) गर्न हिम्मत नगरपालिकाले गर्ला कि?भन्दै मन्त्री यादवले स्टाटस लेखेका छन् ।
सिटिईभिटी (CTEVT) भवन निर्माणको टेन्डर शुन्य प्रतिशत विल्लो (below) मा कसरी भयो? गोप्य सूचना गरि मिलोमतोमा गरिएको होइन र? भनी उनले प्रश्न गरेका छन् ।
नगरपालिकाका जनप्रतिनिधिहरु विलासी भएको टिप्पणी गर्दै पुर्व मन्त्री यादवले सरसफाइको बजेट फ्रीज गरेर लाखौंको गाडी खरिद गरेको भन्दै आपत्ति व्यक्त गरेका छन् ।
“फोहोर ब्यबस्थापनको बजेट फ्रीज हुने अनि लगभग पौने करोडमा गाडी किन्न किन हिच्किचाहट नहुने ।कस्तो चिन्तन ? ” उनले सामाजिक संजालमा लेखेका छन् ।
काम गर्नेहरूको चेक नगरपालिकाले किन बन्धकीमा राख्या होला भनी प्रश्न गर्दै पुर्व मन्त्री यादवले लेखेका छन्,“हरेक स्थानीय सरकारको कुशासनको भण्डाफोर र प्रतिरोध गरौं ।”