न्यूज टुडे
राजविराज, १ चैत ।
नेपाल पत्रकार महासंघ शाखा सप्तरीको कार्यालय राजविराजमा गरिएको तालाबन्दी जारी रहेको छ । सदस्यता सिफारिसमा भेदभाव र पक्षपात गरेको विरुद्धमा स्थानीय पत्रकारहरुले गरेको तालाबन्दी बिहीवार आठौं दिन पनि जारी रहेको हो ।
पत्रकारिता क्षेत्रमा योगदान गरेका वरिष्ठ पत्रकार तथा क्रियाशिल पत्रकारहरुको नाम सदस्यताबाट हटाउने सूचीमा राखी सिफारिस गरेको विरुद्धमा महासंघको कार्यालयमा तालाबन्दी गरिएको आन्दोलनरत पत्रकारहरु बताउँछन् ।
सप्तरीको पत्रकारिता क्षेत्रमा योगदान गरेका पत्रकारहरुको सदस्यता नविकरण गर्नुपर्ने लगायतका तीन सुत्रीय माग उनीहरुको छ ।
माग सम्बोधन नभएसम्म तालाबन्दी जारी राख्ने आन्दोलनरत पत्रकारको अडान छ । आफुहरुमाथि महासंघले विभेदपुर्ण निर्णय गरि सदस्यताबाट हटाएकोले बाध्य भएर आन्दोलनमा जानु परेको उनीहरुको भनाई छ ।
नेपाल पत्रकार महासंघ शाखा सप्तरीले तीन बर्ष वितिसक्दा पनि एकपटक पनि साधारणसभा नगरेको, सदस्यता सुद्विकरणको नाममा पक्षपात गरि सदस्यता नविकरण नगरेको, योग्य पत्रकारहरुलाई सदस्यता प्रदान नगरेको उनीहरुको आरोप छ ।
पक्षपातपुर्ण निर्णय सच्याएर महासंघमा आवद्ध सम्पुर्ण पत्रकारहरुको सदस्यता नविकरण गर्नुपर्ने, योग्यता पुगेका पत्रकारहरुलाई नयाँ सदस्यता दिनुपर्ने र महासंघको साधारणसभाको मिति घोषणा गरि कायम सम्पुर्ण सदस्यहरुलाई सहभागी गराउन माग गर्दै तीन दिने अल्टिमेटमसहित महासंघका अध्यक्ष श्रवण कुमार देवलाई फागुन २० गते उनीहरुले ज्ञापनपत्र समेत बुझाएका थिए ।
तालाबन्दीका कारण महासंघ सप्तरीको कार्यालयबाट प्रदान हुने सम्पुर्ण सेवा ठप्प भएको छ भने समस्या समाधानप्रति दुबैपक्षले चासो दिएको छैन ।