सप्तरी प्रहरीले दुई दिन अघि हनुमाननगर कंकालिनी नगरपालिका वडा नै १२ बाट भारत तर्फ निकासी गर्दै गरेको अवस्थामा ८५ कार्टुन स्याउ नियन्त्रणमा लिएको छ । चाईनिज उक्त स्याउ नेपालबाट भारततर्फ निकासी गर्दै गरेको अवस्थामा एक जना तस्करलाई पनि नियन्त्रणमा लिएर कारवाही अघि बढाएको हो ।
सप्तरीमा स्याउ तस्करी गरेको यो पहिलो पटक मात्र होईन । यसअघि पनि ठूलो परिमाणमा चाईनिज स्याउ प्रहरीले नियन्त्रणमा लिएको थियो । तस्करी स्याउको मात्र होईन, लागुऔषध, मदिरा आदि पनि भारततर्फ निकासी गर्दा धेरै पटक तस्कर पक्राउ परेका छन् । प्रहरीले सक्रियता देखाएका कारणले नै तस्कर पक्राउ परेका हुन् ।
भन्सार छलेर गरिने यस्तो अबैध धन्दाका पछाडि गिरोहकै सक्रियता छ भन्ने कुरा पटक–पटक यसरी तस्करी गर्दा सामान तथा मानिस पक्राउ पर्दै गएको घटनाले पनि प्रष्ट्याएकै छ । कोरोना संक्रमणका समयमा सीमामा गस्ती बढाउँदा पनि तस्करी नरोकिएका कारण तस्करको जालो कतिसम्म जरो गाडेर बसेको छ भन्ने कुराको पुष्टी मिल्दछ । त्यसमाथि दैनिक उपभोग्य वस्तु, गुट्खा, खैनी, कपडा लगायतका सामान भन्सार छलेर ल्याउँदा बराबर नै पक्राउ परिरहने गरेका छन् ।
राजस्व मारेर कमाउन सुरु गरिएको यस प्रकारको अबैध धन्दामाथि कडाई गरिएन भने यसले सरकारको राजस्व पनि सुकेर जाने निश्चित छ । राजस्व मारा यो धन्दा नरोक्ने हो भने भन्सार सुक्दै जाने अनि तस्कर मोटाउँदै जाने भएका कारणले यसलाई गम्भीरताका साथ लिनु पर्ने हुन्छ ।