राजविराज, २५ मंसिर । महिलामाथि बलात्कार गर्न खोजेको आरोपमा सप्तरीको शम्भुनाथ नगरपालिकाका एक वडा अध्यक्षसहित तीन जना पक्राउ परेका छन ।
जिल्ला प्रहरी कार्यालयबाट खटिएको विशेष टोलीले वडा नम्वर १२ का वडा अध्यक्ष लक्ष्मी साहसहित तीन जनालाई बुधवार विहान पक्राउ गरेको हो । पक्राउ परेका अन्य दुई जनाको नाम भने प्रहरीले सार्वजनिक गरेको छैन ।
थप अनुसन्धानपछि दुवैको नाम पनि सार्वजनिक गरिने डिएसपी तिलक भारतीले जानकारी दिए । नेपाली काँग्रेसबाट वडा अध्यक्ष पदमा निर्वाचित भएका साह र अन्य दुई जनाले आफुमाथि सामूहिक बलात्कार गर्न खोजेको भन्दै सोही ठाउँकी एक महिलाले प्रहरीमा उजुरी दिएपछि उनीहरुलाई पक्राउ गरिएको प्रहरीले जनाएको छ ।
उजुरीअनुसार गत मंसिर १४ गते वडा अध्यक्ष साहले दुवै जनालाई मोटरसाइकलमा पठाएर कामको वहानामा वडा अध्यक्षकै कुखुरा फर्म बोलाएको तथा सोही ठाउँमा सामूहिक बलात्कार गर्न खोजेको उल्लेख छ । सोही उजुरीको आधारमा वडा अध्यक्ष साहसहित तीनै जनालाई नियन्त्रणमा लिएर अनुसन्धान भईरहेको डिएसपी भारतीले बताए ।
विपक्षीको षड्यन्त्रण रहेको दावी
घटनाबारे नेपाली काँग्रेस जिल्ला कार्य समिति सप्तरीको गम्भिर ध्यानाकर्षण भएको छ । पार्टीले बुधवारै विज्ञप्ति जारी गर्दै स्थानीय विपक्षी समूहबाट पूर्वनियोजित ढंगले घटना गराइएको ठहर गरेको छ । जिल्ला कार्य समितिका सचिव शत्रुध्न प्रसाद यादवले जारी गरेको विज्ञप्तिमा पुरानो रिसिबी साध्न, वडा अध्यक्ष साहलाई बदनाम गराउन र फसाउँने नियतले रचिएको षड्यन्त्र रहेको दावी गरिएको छ ।
घटनाको सुक्ष्म तथा उच्चस्तरीय छानवीन आयोग गठन गरी अविलम्व छानवीन प्रारम्भ हुनुपर्ने र पीडित भनिएकी महिलामाथि पनि छानवीन हुनुपर्ने विज्ञप्तिमा माग गरिएको छ ।