राजविराज, १४ वैशाख । राजविराजका केही पुस्तक व्यवसायीहरूको संयुक्त लगानीमा सञ्चालित राजविराजको ‘पुस्तक महल’ औपचारिक रुपमै बन्द भएको छ ।
विद्यार्थी संगठनको विरोध र आन्दोलनपछि शनिवार सम्पन्न सर्वपक्षिय बैठकमा ‘पुस्तक महल’ वन्द गर्ने निर्णय भएको हो । पुस्तक महलले पाठ्यपुस्तक विक्री–वितरणमा सिन्डिकेट लागू गरेको विषय पुष्टि गर्दै उक्त पसल बन्द गर्ने र जिल्लाभरीका हरेक पुस्तक पसलवाट सहज रुपमा पाठ्यपुस्तक विक्री वितरणको ब्यवस्था मिलाउने बैठकले निर्णय गरेको छ ।
निजि विद्यालयको पाठ्य पुस्तकमा ब्यवहारिकता हेरी सम्भव भएसम्मको छुट दिन पनि ब्यसायीहरु सहमत भएका छन् । यसअघि ब्यवसायीहरुले पाठ्यपुस्तकमा छुट नदिने निर्णय गरेका थिए । बैठकमा राजविराज नगरपालिकाका मेयर शम्भु यादव, पुस्तक ब्यवसायी महासंघ, सप्तरीका अध्यक्ष शिवनारायण साह (सुरज), विद्यार्थी संगठनका प्रतिनिधि लगायतको सहभागिता थियो ।
राजविराजका आधा दर्जनभन्दा बढी पुस्तक ब्यवसायीको संयुक्त लगानीमा सञ्चालित पुस्तक महल र सिन्डिकेटको विरोध गर्दै विद्यार्थी संगठनहरु विरोधमा थिए । उनीहरुले बैशाख १० गते जिल्ला प्रशासन कार्यालय सप्तरीमा ज्ञापनपत्र समेत बुझाएका थिए । स्थानीय प्रशासनले आफुहरुको आग्रहलाई बेवास्ता गरेको भन्दै आक्रोशित विद्यार्थीले बुधबार पुस्तक महलमा तालाबन्दी गरेका थिए । व्यवसायीको सेन्डिकेटले विद्यार्थी, अभिभावक मर्कामा परेको भन्दै अनेरास्ववियू, अनेरास्ववियू क्रान्तिकारी), संयुक्त विद्यार्थी फोरम, नेविसंघ, राष्ट्रिय विद्यार्थी संघ लगायतका विद्यार्थी संगठनले त्यसको विरोध जनाउँदैआएका थिए ।