सिरहा, ६ माघ । पूर्व–पश्चिम लोकमार्ग अन्तर्गत सिरहाको लहान नगरपालिका–३ मा बिहिबार स्कुल बसले ठक्कर दिँदा साइकलयात्री महिलाको मृत्यु भएको छ ।
मृत्यु हुनेमा लहान–३ का ३८ वर्षिया रामपरी महतो रहेकी छिन् । महतोलाई अपरान्ह साढे तीन बजे लहानस्थित एपोलो उच्च माध्यमिक विद्यालयको स. १ क १११ नम्बर बसले ठक्कर दिएको हो । बसको ठक्करबाट गम्भीर घाइते भएकी महतोको उपचारकालागि लैजाने क्रममा मृत्यु भएको इलाका प्रहरी कार्यालय लहानले जनाएको छ।
ठक्कर दिने बस प्रहरीको नियन्त्रणमा छ भने चालक फरार भएकाले खोजी भईरहेको छ।
यता सोलुखुम्बुको दुधकुण्ड नगरपालिका–५ सल्लेरी बजारमा बिहिवार अपरान्ह मोटरसाइकलको ठक्करबाट सिरहा लहान नगरपालिका–६ घरभई सल्लेरी बजारका सरोज ठाकुरको चार वर्षिय छोरा सुन्दर ठाकुर घाइते भएका छन् । अपरान्ह साढे तीन बजे बाटोमा खेल्दै गर्दा उनलाई बा ३६ प २४६५ नम्बरको मोटरसाइकलले ठक्कर दिएको हो । टाउकोमा गम्भीर चोट लागेको बालकलाई उपचारकालागि कान्ति बाल अस्पताल काठमाण्डौ पठाइएको जिल्ला प्रहरी कार्यालयले जनाएको छ ।