धनुषा, २८ मंसिर । स्वतन्त्र मधेश गठबन्धनका १७ जना समर्थकलाई प्रहरीले विना कारण पक्राउ गरी हिरासतमा यातना दिएको भन्दै हङकङ स्थित एशियन ह्युमन राइट्स कमिशनले गम्भीर आपत्ति जनाएको छ ।
गत मंगलवार जनकपुरमा विवाहपञ्चमीको मेला पश्चात् नगरमा रहेको फोहरमैला सरसफाई गर्ने क्रममा गठबन्धनका समर्थकहरुलाई पक्राउ गरिएको थियो । एशियन ह्युमन राइट्स कमिशनले पक्राऊ परेकाहरुलाई धनुषाको सिडिओ दिलीप चापागाईं र एसपी लालमणी आचार्यले यातना दिएको भन्दै उक्त कार्यको प्रेस विज्ञप्तिमार्फत घोर भत्र्सना गरेको छ । 
यता हिरासतमै प्रहरीले यातना दिएको विरोधमा गत बिहीवारदेखि नै अनशनमा बसेका संजय कुमार यादव र उपेन्द्र रोहिताको स्वास्थ्य स्थिति गम्भीर भई सोमबार बेलुका सांझ ७ बजे उनीहरुलाई प्रहरीले जनकपुर अंचल अस्पतालको इमरजेन्सीमा भर्ना गरिएको छ । इमरजेन्सी कक्षमा उनीहरुको उपचार अझै जारी नै रहेको जनाईएको छ ।
यस्तै पछिल्लो मिति राखेर र उल्टो झूठो बयान लेखेर यातना दिई आफूहरुलाई प्रहरी प्रशासनले जबरजस्ती हस्ताक्षर गर्न लगाएको भन्दै मंसीर २६ गते आइतबारदेखि मुबारक हुसैन, अभिमन्यु महतो र फुलचन मुखिया गरी थप ३ जना पनि प्रहरी हिरासतमै अनशनमा बसेका छन् ।
जनकपुर उच्च अदालतमा कैदीहरुको तर्फबाट बिहीबार नै परेको बन्दी प्रत्यक्षीकरणको मुद्दामा सुनुवाई आइतबार नै सके पनि अदालतले फैसला न दिई मंसिर २९ गतेकोलागि पेशी दिएको थियो, जसले गर्दा निर्दोष कैदीहरु जाडोमा यातनापूर्वक प्रहरी हिरासत मैं विगत हप्तादेखि बस्न बाध्न भएका छन् ।
१७ जनालाई पक्राऊ गरेर हिरासतमा राखेकोमा दुई जना नाबालक छन् । उनीहरुको जन्मदर्ता प्रमाणपत्र समेत प्रहरीमा पेश गरे तापनि उनीहरूलाई नछाडिएको स्वतन्त्र मधेश गठबन्धनका सह–संयोजक कैलाश महतोले प्रेस विज्ञप्ति मार्फत जनाएका छन् ।