राजविराज, २५ फागुन । १०६ औं अन्तराष्ट्रिय महिला दिवसको सन्दर्भमा तय गरिएको नारा सम्वन्धि विवादका बीच र्याली तथा मञ्चीय कार्यक्रम सम्पन्न भएको छ ।
‘संविधानलाई ब्यवहारमा उतारौं, महिला अधिकार सुनिश्चित गरौं’ भन्ने नारा र ‘संविधान सुधारौं र ब्यवहारमा उतारौं, महिला अधिकार सुनिश्चित गरौ’ भन्ने छुट्टा–छुट्टै नाराका साथ अन्तराष्ट्रिय महिला दिवस मनाइएको हो । आन्दोलनरत मधेशवादी दल निकटका महिला सङ्गठनहरुले ‘संविधानलाई ब्यवहारमा उतारौं, महिला अधिकार सुनिश्चित गरौं’ भन्ने नाराका साथ र्याली निकालेका छन् । 
यता मूल समारोह समितिले भने दिवसको संविधानवाला राष्ट्रिय नारा बिना नै कार्यक्रम आयोजना गरेको थियो । राजविराज स्थित शिव मन्दिर प्राङ्गणबाट निकालिएको र्यालीमा अगाडि मधेशवादी दलका महिलाहरुको जुलुस रहेको थियो भने त्यसपछि समग्र विकास केन्द्रको व्यानरमा महिला प्रहरीसमेतको सहभागितामा राष्ट्रिय नाराकासाथ जुलुस निकालिएको थियो ।
नगरको विभिन्न भाग परिक्रमा पश्चात र्याली जिल्ला विकास समिति सप्तरी सभाकक्षमा पुगेर टुङ्गिएको थियो । सभाकक्षमा आयोजित मञ्चीय कार्यक्रममा विभिन्न महिलाहरुलाई सम्मानित समेत गरिएको थियो । मधेशी महिलाहरुले राष्ट्रिय नाराको व्यापक विरोध जनाएका थिए ।
यस अघि संघीय समाजवादी महिला फोरम, नेपालले गत विहीबार प्रमुख जिल्ला अधिकारी नारायण भट्ट मार्फत नारा सच्याउन महिला तथा वालवालिका मन्त्रालयलगायत विभिन्न मन्त्रालय तथा मानवअधिकार आयोगमा ज्ञापन पत्र पठाएका थिए ।
