न्यूज टुडे
राजविराज,१६ जेठ ।
सप्तरीको छिन्नमस्ता गाउँपालिकामा ४ लालपट्टीमा पाँच बर्षकी बालिकालाई जबर्जस्ती करणी गरेको आरोपमा एक जना पक्राउ परेका छन् । स्थानीय १८ बर्षीय राजिव यादवलाई शुक्रबार प्रहरीले नियन्त्रणमा लिएको हो ।
स्थानीय पोखरीको डिलमा रहेको बाँसघारीमा चकलेट दिएर ललाई फकाई बालिकालाई करणी गरेको बालिकाको आमाले दर्ता गरेको जाहेरीको आधारमा युवकलाई नियन्त्रणमा लिएको प्रहरीले जनाएको छ । बालिकाले हो-हल्ला गरेपछि पोखरीमा भाडाकुडा सफागर्ने महिलाहरुले सुनेर घटना स्थलमा पुग्दा फरार भएको यादवलाई खोजतलास गर्ने क्रममा फेला पारी पक्राउ गरेको जिल्ला प्रहरी कार्यालयले सप्तरीले जनाएको छ ।
पक्राउ परेका युवकमाथि जबर्जस्ती करणी कसुरमा मुद्दा दर्ता गरि सप्तरी जिल्ला अदालत राजविराजबाट ३ दिनको म्याद लिइ अनुसन्धान अगाडि बढाइएको जिल्ला प्रहरी कार्यालयका प्रहरी निरीक्षक विजय कार्कीले बताए ।
यसैगरी एक युवतीको अपहरणको आरोपमा ३ जना पक्राउ परेका छन् । पक्राउ पर्नेमा सिरहा कर्जनाहा नगरपालिका ३ का ४२ बर्षीय आनन्द दास तत्मा, बर्ष ५० की राम कुमारी देवी र सिरहा नगरपालिका ९ को बर्ष ५० की शिव सुनैर देवी छन् ।
स्थानीय संगीता कुमारी मण्डललाई राजविराज ८ स्थित आमालाई भेट्न आएको बेला जबर्जस्ती अपहरण तथा शरीर बन्धक बनाएको आरोप उनीहरुमाथि छ । उनीहरु विरुद्ध अपहरण तथा शरीर बन्धक कसुरमा मुद्दा दर्ता गरि सप्तरी जिल्ला अदालतबाट ३ दिनको म्याद लिई अनुसन्धान अगाडि बढाइएको प्रहरीले बताएको छ ।
यस्तै चोरीको आरोपमा बोदेबर्साइन नगरपालिका ५ का बर्ष १९ को शिव कुमार सदा पक्राउ परेका छन् । खडक नगरपालिका ५ बाट भैंसी चोरी गरेको आरोपमा सदालाई प्रहरी नियन्त्रणमा लिएको जनाएको छ ।
पक्राउ परेका सदा विरुद्ध चोरी कसुरमा मुद्दा दर्ता गरि सप्तरी जिल्ला अदालत राजविराजबाट ५ दिनको म्याद थप गरि अनुसन्धान अगाडि बढाइएको प्रहरी निरीक्षक कार्कीले जानकारी दिए ।
