न्यूज टुडे
राजविराज,२४ माघ ।
सप्तरीको रुपनी गाउँपालिका ६ दुधैला खोलामा शनिबार नेपाली सेनाले छोडेको बेवारिसे बम बिष्पोट हुँदा ४ जना बालक गम्भीर घाइते भएका छन् । दुधैला खोला पिकनिक (बनभोज) खान गएका स्थानीय बालकहरु बम विष्पोट भएर छर्रा लागेर गम्भीर घाइते भएका हुन् ।
रुपनी गाउँपालिका ६ का साजन आले मगरको छोरा बर्ष ११ का साहास मगर, मनोज थापा मगरको छोरा बर्ष ९ का प्राशिस थापा मगर,कर्ण बहादुर थापा मगरका छोरा बर्ष १६ का कविर थापा मगर र पदम बहादुर विकको छोरा बर्ष १३ का सुरज विक बम बिष्पोटमा परी घाइते भएका छन् ।
शनिबार विहानै घरदेखि नजिकै रहेको बनमा पिकनिक खाना गएका उनीहरु विहान साढे ११ बजे एक्कसी बम विष्पोटमा परी घाइते भएको स्थानीयले बताएका छन् ।
घाइते चारैजनालाई मधेस प्रदेश प्रहरी अस्पताल रुपनीमा उपचारका लागि भर्ना गरिएपनि थप उपचारका लागि राजविराज पठाइएको स्थानीय टेक प्रसाद समाल मगरले बताए ।
घाइते मध्ये साहाशको र प्राशिसको पैताला गम्भीर चोट लागेको तथा शरीरको विभिन्न भागमा बमको छर्रा लागेको छ । भने कबिर र सुरजको शरीरको विभिन्न भागमा बमको छर्रा लागेको स्थानीयले बताएका छन् । घाइतेहरुको राजविराज स्थित छिन्नामस्ता अस्पतालमा उपचार भइरहेको तथा घटना बारे थप अनुसन्धान भइरहेको जनाइएको छ ।
उक्त स्थान नेपाली सेनाको अभ्यास स्थल रहेको र सेनाले विर्सीएर छोडेको वा बम विष्पोट गर्ने क्रममा असफल भई हराएको बम बिष्पोट भएको हुन सक्ने स्थानीयले आशंका गरेका छन् ।
अभ्यासमा रहेका नेपाली सेना १ महिना अगाडि फिर्ता गएको तथा बम हराएको भन्दै १०/१५ जनाको टोली मात्र त्यस स्थानमा बस्दै आएको स्थानीयले जानकारी दिएका छन् ।
