उत्तम आचार्य
कञ्चनरूप, १९ पुस ।
सप्तरीको कोशी व्यारेजमा स्नान तथा मेला भर्न आउनेहरु घुइँचो लागेको छ । हरेक वर्ष झै शुक्ल पूर्णिमा अर्थात पुसी पूर्णिमाको अवसरमा बिहिवार बिहानैदेखि कोशी स्नान गर्ने तथा मेला भर्नेको घुइँचो लागेको हो ।
चिसोका बाबजुद सप्तरीको हनुमाननगर कंकालिनी नगरपालिका–१ भारदह स्थित कोशी ब्यारेजमा बिहानैदेखि कोशी स्नान तथा मेला भर्न आउनेहरूको घुइँचो लागेको स्थानीयले जनाएको छ । यहाँ बिहानै कोशीलगायतका जलासयमा नुहाएर मिठोचोखो खाने चलन रहँदै आएको स्थानीयले बताए ।
कोशी ब्यारेजमा सप्तरी, सिरहा, सुनसरी, मोरङ, भारतको पूर्णिया, मधुवनी, फारबिसगञ्ज, अररिया, बनमनखीलगायतका स्थानहरूबाट कोशी स्नान गर्न आएको स्थानीय रवि शर्माले जानकारी दिए । उनका अनुसार बिहानैदेखि बैलगाडा, मोटरसाइकल, रिक्सा, ई–रिक्सा, साइकलसहितका अन्य सवारीसाधनबाट मेला भर्न तथा कोशी स्नानका लागि आउनेहरूको दिनभरि घुइँचो लाग्ने गर्दछ ।
कोशी नदीलाई कौशिका माताका रूपमा पूजा गर्ने चलनअनुसार यस दिन कोशीमा नुहाएर मात्र खानेकुरा खाए हरेक इच्छा पूरा हुने विश्वास रहिआएको छ । यस दिन मेलामा भुजा, च्यूरा, पुरी, तरकारी, जेरीसहितका मिठाइहरू खाने प्रचलन छ ।
मेलामा कुनै किसिमको अप्रिय घटना हुन नदिन सुरक्षा ब्यवस्थामा समेत कडाइ गरिएको मेला समितिले जनाएको छ । पूर्वपश्चिम राजमार्गको मुख्य सडकमै पर्ने कोशी ब्यारेज परेको हुनाले कोशी मेलामा सुरक्षित एवम् सहज तरिकाले मेला गर्ने उद्देश्यले व्यवस्थित गर्न ट्राफिक प्रहरी पनि परिचालन गरिएको जनाइएको छ ।
विशेष गरी जिल्लाको भारदहस्थित कोशी ब्यारेज, सप्तकोशी नगरपालिकाको ओद्राहास्थित मेग्जिन चुरिया, वैरवाको मलकौर र कञ्चननरुप नगरपालिकाको जगतपुरस्थित धनकट्टा, कन्चनरुप ५ स्थित पथरी हनुमाननगर, कुनौली बोर्डर, इटहरी विष्णुपुर लगायतका स्थानहरूमा समेत भव्य मेला लागेको छ ।
कृषि मेलाको रुपमा समेत चिनिने यो एक दिने मेलामा कृषि औजारका साथै घरेलु प्रयोजनमा प्रयोग हुने हस्त निर्मित सामग्रीहरूको खरिद बिक्रीका लागि महत्त्वपूर्ण मानिन्छ । यस कारणले पनि कृषकहरुको कोसी मेलामा बढी उपस्थिति हुने गरेको स्थानीयहरू बताउँछन् ।
पौष शुक्ल पूर्णिमाका दिन कोशी स्नान गरेपछि पापबाट मुक्ति पाउने तथा गंगास्नान गरे सरह पुण्य मिल्ने जनविश्वास रहेको स्थानीयले जानकारी दिए ।
उक्त अवसरमा सप्तरीको सप्तकोशी नगरपालिका, कञ्चनरुप नगरपालिका, हनुमाननगर कङ्कालिनी नगरपालिका, राजविराज नगरपालिका, अग्नीसाईर कृष्णासवरन गाउँपालिकालगायत एक दिनका लागि बिदा दिएको छ ।
स्थानीय तहहरुले बुधबार छुट्टाछुट्टै विज्ञप्ति जारी गर्दै पुसी पूर्णिमाका अवसरमा बिदा दिएको जनाइएको छ ।