न्यूज टुडे
राजविराज,०९ पुस ।
बढ्दो शीतलहरका कारण सप्तरीको जनजीवन प्रभावित भएको छ । चिसोका कारण पठनपाठनसहित सेवा प्रभावित भएको हो ।
ठण्डी बढेसंगै बोदेबरसाईन नगरपालिकाका सम्पूर्ण सामुदायिक विद्यालय बुधबारदेखि पाँच दिनका लागि बन्द गरिएको छ । शीतलहरले जीनजीवन प्रभावित भइ बालबालिकालाई विद्यालय आउन जान गर्न असहज भइरहेकाले पुस १३ गतेसम्म सामुदायिक विद्यालय बन्द गरिएको नगर प्रमुख आतेशकुमार सिंहले बताए ।
केही दिनदेखि तराई क्षेत्रमा अत्यधिक चिसो बढेको परिस्थितिलाई ध्यानमा राख्दै विद्यालय बन्द गरिएको उनले जानकारी दिए । बालबालिकाको स्वास्थ्यमा असर नपरोस् भनेर विद्यालय बन्द गर्ने निर्णय गरिएको उनको भनाइ छ ।
सप्तरीमा एकहप्ता देखि चिसो हावासंगै बढ्दो शीत लहरले ह्वात्तै ठण्डी बढेको छ । ठण्डी बढेपछि रुघाखोकी, निमोनियाँ तथा स्वासप्रस्वासका रोगीहरुको चाँप अस्पतालमा बढ्न थालेको छ ।
