न्यूज टुडे
राजविराज,०३ बैशाख ।
सप्तरीको तिरहुत गाउँपालिका ५ स्थित प्रसिद्ध भेडिया मठमा रुद्र महायज्ञ सप्ताह हुने भएको छ । आयोजकले मठको प्राङ्गणमा विहिबार पत्रकार सम्मेलन आयोजना गर्दै २०८३ बैशाख २४ गतेदेखि जेठ १ गतेसम्म महायज्ञ संचालन हुने जानकारी गराएको हो ।
महायज्ञमा विश्व ख्याति प्राप्त यज्ञ आचार्यहरुले सप्ताहव्यापी शिव महापुरण दिव्य कथा बाचन गर्ने आयोजक प्रेणा श्रोत एवम् पावन सनिध्य स्वामी दुर्गेशनन्द उदासीनले बताए ।
उक्त अवसरमा भारतको काँशीबाट यज्ञ आचार्य वैदिक उमेश पाण्डे,भारत हिमान्चल प्रदेशका व्यास पिठ महन्थ श्री सुशांत मुनि जी महाराज, स्वयम आफूले दिव्य कथा वचन गर्ने उदासीनले बताए । सलाई प्रयोग नगरी मन्तरोचरण गरि दिप प्रज्जवलन गर्ने तथा धुनी बाल्ने रुद्र महायज्ञको अर्को विशेषता रहेको उनले जानकारी दिए ।
तिरहुत गाउँपालिकाका अध्यक्ष विजय कुमार यादवले बाबा बनखण्डी तपोभुमि समाधि स्थल भेडिया मठको प्रचारप्रसार, विकास र मानव कल्याण तथा मोक्ष प्राप्तिका लागि महायज्ञ आयोजना गरिएको बताए ।
नेपाल तथा भारतका गरि हजारौंको संख्यामा सहभागी रहने महायज्ञमाको उद्घाटनको पहिलो दिन २४ बैशाखमा कलशयात्र निकालेर उद्घाटन हुने उनले बताए । उनका अनुसार बैशाख २५ गते पन्चाङ पूजन एवम् मण्डप प्रवेश, बैशाख २६ गते आरसी मन्थन एवम् भठादिन र जेठ १ गते पूर्ण आहुती तथा भण्डारा आयोजना गरिनेछ । उक्त अवसरमा मेला,रोटेपिङ, रामलिला जस्ता कार्यक्रम आयोजना गरिने अध्यक्ष यादवले बताए ।
रुद्र महायज्ञ समितिका संयोजक कुलबाबू ( दुर्गानन्द मिश्र))ले यज्ञको कुल खर्च ४० लाख अनुमान गरिएकोमा चन्दा संकलन गरि व्यवस्था मिलाइने बताए । उनले भेडिया मठ देश विदेशमा प्रचारप्रसार गरि विश्व सम्पदा सूचीमा पार्न तथा कार्यक्रम सफल बनाउन सबैपक्षलाई सहयोगका लागि आग्रह गरे ।
कार्यक्रम उद्घाटनका लागि संघीय मन्त्रीसंग कुराकानी भइरहेको उनले बताए ।