न्यूज टुडे
राजविराज, १४असोज।
सप्तरीमा केही दिनदेखि बढेको अत्याधिक गर्मीका कारण सर्पको विगविगी बढेको छ । असोज लागेपछि चर्को घामसँगै बढेको गर्मीले जनजीवन अति प्रभावित भएको हो ।
सहनै नसक्ने घामले गर्दा मानव तथा जीवजन्तुमा पनि उतिकै कठिनाइ भएको छ । सर्प सहितका माटोमुनी बस्ने जीवजन्तु बाहिर निस्किन थालेको छ । यसैगरी सप्तरीको डाक्नेश्वरी नगरपालीका ९ मा सर्पदंशबाट एक महिलाको मृत्यु भएको छ । ३६ वर्षीया लल्तो सदाको सर्पदंशबाट मृत्यु भएको हो ।
भारतको मधुबनी जिल्ला घर भई हाल माईती घरमा पाहुना आएका उनलाई सोमबार राति करिब १२ बजेतिर सर्पले रोकेको दाजु श्रवण सदाले बताए ।
घरमा खाना खाइरहेका बेला दुल्लोबाट निस्किएको सर्पले बहिनीको खुट्टामा टोकेपछि घाइते भएको उनले बताए । उनले घाइते बहिनीलाई तत्कालै कल्याणपुरस्थित श्री बरखगण सर्पदंश उपचार केन्द्रमा भर्ना गरिएको बताए ।
कल्याणपुरमा प्रारम्भिक उपचारपछि थप उपचारका लागि सिरहाको लहानस्थित प्रादेशिक अस्पताल लगिएकोमा उपचारको क्रममा मंगलबार बिहान करिब ४ बजे बहिनीको ज्यान गएको उनले जानकारी दिए ।
सदाको सर्पको टोकाईबाट मृत्यु भएको जिल्ला प्रहरी कार्यालय सप्तरीले जनाएको छ ।
असोज महिनामा यसपालि इतिहासमै सबैभन्दा बढी गर्मी महसुस भएको रूपनी गाउँपालिका ६ का ७५ वर्षिय टङ्गक वहादुर मगरले बताए।
