न्यूज टुडे
राजविराज,३१ साउन ।
जनता समाजवादी पार्टी नेपाल मधेस प्रदेश समितिले नयाँ पत्रिका दैनिकका सप्तरी संवाददाता सौरभ यादवमाथि भएको आक्रमणप्रति गम्भीर ध्यानाकर्षण भएको जनाएको छ । प्रदेश अध्यक्ष बालकिशोर यादवले शनिबार एक प्रेस विज्ञप्ति जारी गर्दै पत्रकार यादवमाथि भएको साँघतिक आक्रमणप्रति पार्टीको गम्भीर ध्यानाकर्षण भएको जनाएका हुन् ।
जसपा नेपाल प्रदेश समितिद्वारा जारी विज्ञप्तिमा सदरमुकाम राजविराजमा दिनदहाडै पत्रकार यादवमाथि भएको आक्रमणको घटनाप्रति निन्दा व्यक्त गर्दै घोर भर्त्सना गरेको छ ।
पत्रकार तथा सर्वसाधारणको समेत सुरक्षा व्यवस्था मिलाउन आग्रह गर्दै प्रेस विज्ञप्तिमा घटनामा संलग्नहरुलाई अविलम्ब पक्राउ गरि कारबाही गर्न स्थानीय प्रशासनसंग जोडदार माग गरिएको छ ।
पत्रकार यादवमाथि राजविराजस्थित गजेन्द्रनारायण सिंह अस्पतालको दक्षिणि गेट अगाडि शुक्रबार १० :४२ बजे तीन जनाको समूहले चक्कु, बेल्ट, हेलमेटले प्रहार गरेका थिए ।
टाउको तथा शरिरमा चोट लागेका यादवको गजेन्द्रनारायण सिंह अस्पतालमा उपचार भइरहेको छ।
अस्पताल गेट अगाडि सहकर्मीसंग कुरा गरिरहेको बेला छिन्नमस्ता गाउँपालिका–१ विरपुरका कृष्णनाथ यादव (क्याप्टेन), राजविराज–११ राजु यादव र विष्णुपुर गाउँपालिका–७का राजबाबु झाले एक्कासी आक्रमण गरेको पत्रकार यादवले बताए ।
जिल्ला प्रहरी कार्यालय सप्तरीका प्रबक्ता डिएसी जितेन्द्र बस्नेतले पत्रकार यादवमाथि आक्रमण गर्ने मध्ये १ जना पक्राउ परेको बताए । राजविराज ११ का ३२ बर्षिय राजु यादवलाई नियन्त्रणमा लिई अनुसन्धान अगाडि बढाइएको तथा अन्यको खोजी भइरहेको उनले बताए।