सप्तरीको प्रसिद्ध धार्मिक स्थल छिन्नमस्तासम्म जाने सडक भत्केर खाल्डै खाल्डा बन्दा पनि त्यसको अवस्था सुधारका लागि समयमा ध्यान नदिँदा यात्रुलाई सास्ती हुने गरेको कुरा नौलो होईन । अहिले सडक स्तरोन्नतिको काम चालु रहेतापनि ठेकेदारको विलम्वका कारण सडक लथालिंग अस्थामा छ । केही खण्ड पिच भईसक्दा पनि आधा भन्दा बढी भाग खनेर छाडिदिनाले वर्षामा यात्रा गर्न साह्रै नै कष्टपूर्ण अवस्था रहेको उक्त सडकबाट यात्रा गर्ने जोसुकैले महसुस गर्न सक्दछन् । छिन्नमस्ताकै पश्चिमतर्फ रहेको मोहनपुर सडक खण्ड अहिले वर्षायाममा धान रोप्नका लागि हिल्याएर तयार पारिएको खेतजस्तो भएको छ ।
छिन्नमस्ता बजार भएरै जानुपर्ने मोहनपुर सडकको अवस्था विगतदेखि नै दयनीय रही आएका कारणले त्यस भेगका जनतालाई अहिले पनि आवागमनमा ठूलै समस्या खेप्नु परिरहेको छ । छिन्नमस्ता गाउँपालिका अन्तर्गतकै उक्त सडकको अवस्था सुधारका लागि केन्द्र, प्रदेश तथा स्थानीय सरकार कसैको पनि ध्यान नपुग्दा जनतालाई ठूलो सकस छ । जरुरी काम लिएर छिन्नमस्ता गाउँपालिका कार्यालय, सदरमुकाम राजविराजसम्म पुग्न हिलाम्य सडकका कारणले घण्टौं लाग्ने गरेको छ । गाउँपालिकाले पनि वर्षेनी करोडौं करोडको बजेट चलाउँछ । तर मोहनपुरबासीको समस्यालाई दृष्टिगत गरेर सडक स्तरोन्नतितर्फ ध्यान नपुग्दा जनताले विकासको प्रत्याभूति समेत पाउन नसकिरहेको अवस्था छ ।
विकासको पूर्वाधार वा मेरुदण्डकै रुपमा यातायातको सुविधालाई लिने गरिन्छ । वर्षायाम भरि आवागमनै गर्न नसकिने अवस्थामा पुगेको उक्त सडक खण्डको अवस्थामा सुधार नल्याउने हो भने मोहनपुरबासीका लागि जिल्लाको सदरमुकाम सम्म पुग्नका लागि पनि महाभारत नै हुने कुरा निर्विवाद हुने छ ।
