न्यूज टुडे
राजविराज, १२ असार ।
अविरल वर्षाले सप्तरीको रुपनी गाउँपालिकासहित जिल्लाको विभिन्न स्थानमा गरी एक सयभन्दा बढी घर डुबानमा परेको छ । गएराती देखि आएको अविरल बर्षाले खाडो, महुली,सुन्दरी,खडक, बलान खोलाको बाढी बस्ती पस्दा दर्जनौं गाउँका सयौंघर डुवानमा परेको हो ।
रुपनी गाउँपालिका १ स्थित खाँडो खोलाको होचो तटबन्ध पार गरेर बस्तीमा बाढी पस्दा ३०भन्दाबढी घर डुबानमा परेको स्थानीयले बताएका छन् ।
लगातार आएको मुसलधारे वर्षाले सदरमुकाम राजविराजका ६ दर्जनभन्दा बढी घर डुबानमा परेको छ भने जिल्लाको कञ्चनरूप नगरपालिका– ३ र ११ तथा तिरुहुत गाउँपालिका– १ र २ तिलाठी कोइलाडी गाउँपालिका ७ मा समेत बाढी पसेको छ ।
तथ्यांक संकलन कार्य जारी रहेकोले पीडितहरुको संख्या थपिन सक्ने तथा पीडितको उद्धारका लागि सशस्त्र प्रहरी परिचालन गरिएको जिल्ला विपद समिति सप्तरीले जनाएको छ ।
खाँडो नदीको रूपनी गाउँपालिका स्थित जलमापन केन्द्रमा जलसतह सतर्कता तह बिहान ६:१० बढ्दो क्रममा रहेकोले तटीय क्षेत्रमा सतर्कता अपनाउन मोबाइल म्यासेज मार्फत जल तथा मौसम विज्ञान विभागले सचेत गराएको छ ।
