उत्तम आचार्य
रुपनगर, ११ मंसिर ।
सप्तरीको वलान विहुल नाकाबाट सशस्त्र प्रहरीले एक थान पेस्तोल र दुई राउन्ड गोली बरामद गरेको छ। सशस्त्र प्रहरीले बलान बिहुल गाउँपालिका ४ वेल्हीस्थित सीमावर्ती क्षेत्रबाट आइतबार मध्यराति पेस्तोल र गोली बरामद गरेको हो ।
सशस्त्र प्रहरीका अनुसार पाँच जनाको पैदल गस्ती टोलीलाई देखेपछि नम्बर नखुलेको मोटरसाइकलमा सवार अपरिचित दुई जनाले कपडाको पोका फालेर भारततर्फ भागेका थिए।
कपडाको पोका खोली परीक्षण गर्दा एक थान पेस्तोल र दुई राउण्ड गोली बरामद भएको सशस्त्र प्रहरी बल नेपाल नम्बर ६ गण सप्तरीका सूचना अधिकारी सशस्त्र प्रहरी नायव उपरीक्षक मोहनराज विष्टले बताए ।
सशस्त्र प्रहरीले आवश्यक कारबाहीको लागि बरामद पेस्तोल र गोली जिल्ला प्रहरी कार्यालय सप्तरीमा बुझाएको सशस्त्र प्रहरी बल नम्बर ६ गणले जनाएको छ।
