न्यूज टुडे
राजविराज, ९ असार ।
सप्तरीको राजविराजमा प्रथम मेयर गोल्डकप फुटबल प्रतियोगितासुरु भएको छ ।
राजविराजस्थित राजरंगशालामा शनिवार भएको उद्घाटन खेलमा महोत्तरीले सिरहालाई २–१ गोल अन्तरले पराजित गर्दै विजयी सुरुवात गरेको हो ।
महोत्तरीका तर्फबाट पारस सुसलिंग र कृष्ण लामाले १÷१ गोल गरे भने सिरहाका लागि एक मात्र गोल खेलको ५८ औं मिनेटमा अमन लामाले गरे ।
राजविराज नगरपालिकाको सहयोगमा जिल्ला फुटबल संघ सप्तरीले आयोजना संचालित प्रतियोगिताको राजविराज नगरपालिकाका कार्यवाहक प्रमुख इसरत परविनले उद्घाटन गरिन् ।
उनले खेलकुदको विकासका लागि आफूले सहयोग गर्ने प्रतिबद्धता समेत जनाईन । असार १६ सम्म चल्ने प्रतियोगितामा घरेलु टोली सप्तरीका साथै महोत्तरी, सिरहा, धनुषा, सिन्धुली, उदयपुर, सुनसरी र सर्लाहीका गरि कुल ८ टिमको सहभागिता रहेको आयोजक जिल्ला फुटबल संघ सप्तरीका अध्यक्ष राजकुमार परियारले जानकारी दिए ।
उद्घाटन समारोहमा पूर्वमेयर जगरनाथ दास, शैलेश चौधरी, पूर्व राष्ट्रिय खेलाडी जितेन्द्र नारायण देव, जिल्ला खेलकुद विकास समितिका कार्यालय प्रमुख दिनेश भुजेल लगायतको उपस्थिति रहेको थियो ।