न्यूज टुडे
राजविराज, १४ जेठ ।
सप्तरी निर्वाचन क्षेत्र नम्बर १ (क)बाट निर्वाचित प्रदेशसभा सदस्य एवम पुर्व कानुनमन्त्री राज कुमार लेखीले ५० लाख मुल्यको जग्गा बृद्व आश्रमलाई दान गरेको छ ।
सप्तरीको सप्तकोशी नगरपालिका ५ स्थित गंगाजलीमा रहेको आफ्नो निजि २ कठ्ठा जग्गा बृद्वआश्रमका लागि लेखीले प्रदान गरेको हो । लेखीले दान गरेको जग्गाको हालको चलनचल्तीको मुल्य प्रतिकठ्ठा २५ लाख रुपैयाँ रहेको स्थानीयले जनाएको छ । जग्गा बृद्वआश्रमको भवन निर्माण प्रयोजनका लागि दान गरिएको पुर्वमन्त्री लेखीले जानकारी दिए ।
सम्पुर्ण जीवन सामाजिक परिवर्तनका लागि समर्पण गरे, आदिवासी जनजाति महासंघका पुर्व अध्यक्ष समेत रहेका एमाले नेता लेखीले भने, बाँकी श्रीसम्पत्ति र जीवन देश र जनताको हितमा अर्पण गर्ने सोचले बृद्वाबृद्वको सेवामा जग्गा सहयोग गरेको छु । जग्गामा पुर्वाधार निर्माण कार्यले छिटै पुर्णता पाउने बताउदै उनले बृद्व आश्रमबाट चाडै सेवा प्रवाह हुने विश्वास व्यक्त गरे । लेखी सानैदेखी सामाजिक कार्यमा अग्रपंक्तिमा रहेर काम गर्दै आएका छन् । लेखीको अगुवाइमा गंगाजलीमा जनहित राष्ट्रिय प्राथमिक विद्यालय स्थापना, सहिद दिलिप स्मृति प्रतिष्ठान, मित्र युवा क्लब लगायतका सामाजिक संस्थाहरु संचालनमा छन् । यी संस्थाहरुले सामाजिक विकासको कार्यमा निरन्तर टेवा पुर्याउदै आएको स्थानीयहरु बताउछ्न ।
यसैगरी प्रदेशसभा सदस्य लेखीले सप्तरी निर्वाचन क्षेत्र नम्बर १ (क) को सम्पर्क कार्यालय समेत स्थापना गरेको छ । सप्तकोशी नगरपालिका ४ बलार्दह चौकमा स्थापना गरेको कार्यालय आइतबार एक कार्यक्रमका विच प्रदेसभा सदस्य लेखीले उद्वघाटन गरे । कार्यक्रममा बोल्दै लेखीले जनताको आबश्यकता र समस्यालाई नजिकबाट बुझ्न सहज होस भन्ने उदेश्यले सम्पर्क कार्यालय स्थापना गरेको बताए । उनले आफुले पार्टी र जनतासमक्ष चुनावको बेला गरेको प्रतिबद्धता अनुसार एमाले मधेश प्रदेश समितीलाई प्रतिमहिना १० हजार, जिल्ला समितिलाई ५ हजार र कंचनरुप नगरसमितिलाई ५ हजारको दरले सहयोग गर्दै आएको जानकारी दिए ।
पार्टी गतिविधि संचालनमा सहयोग पुगोस भन्ने उदेश्यले थोरै भएपनि सहयोग गरिएको उनको भनाई थियो । कार्यालय उद्वघाटन समारोहमा सप्तकोशी नगरपालिकाका वडा अध्यक्षहरु, सप्तरी निर्वाचन क्षेत्र नम्बर १ (क) अन्तर्गतका तीनवटै स्थानीय तहका २५ वटा वडाका जनप्रतिनिधिहरु तथा पार्टी नेताकार्यकर्ताहरुको उपस्थिति रहेको थियो ।