न्यूज टुडे
राजविराज, १६ फागुन ।
सप्तरीको कंचनरुप नगरपालिकामा फागुन २५ गते सर्वाधिक राशीको जिल्लास्तरीय बक्तृत्वकला प्रतियोगिता हुने भएको छ । सगरमाथामा साहित्य परिषद्को संयोजनमा कंचनरुप नगरपालिकाले प्रतियोगिताको आयोजना गर्न लागेको हो ।
राजविराजस्थित स्टार होटलमा सोमबार आयोजित पत्रकार सम्मेलनको आयोजना गर्दै फागुन २५ गते सर्वाधिक राशीको जिल्लास्तरीय बक्तृत्वकला प्रतियोगिता गर्न लागेको आयोजकले जनाएको छ । सगरमाथा साहित्य परिषद्का केन्द्रिय अध्यक्ष मनोहर कुमार पोखरेलले प्रतियोगिताबारे जानकारी गराउँदै सर्वोत्कृष्ट हुनेले ११ हजार नगदसहित प्रथम पुरस्कार र प्रमाण–पत्र पाउने जानकारी दिए । यो जिल्लामै पहिलोपटक सबैभन्दा ठूलो राशीको पुरस्कारसहितको बक्तृत्वकला प्रतियोगिता हुने उनले बताए ।
यसैगरी द्वितीय हुनेलाई ८ हजार रुपियाँ र तृतीय हुनेलाई ५ हजार नगद रुपियाँसहित पुरस्कार र प्रमाण–पत्र प्रदान गरिनेछ । शान्तवना पुरस्कार २ जनाले जनही २÷२ हजार र ५ जनाले जनही १÷१ हजारका दरले समतामूलक शान्तवना पुरस्कार र प्रमाण–पत्र प्राप्त गर्नेछन् । प्रतियोगितामा जिल्लाभरीका सबै शिक्षण संस्थाको सिफारिशमा कक्षा ९–१२ मा अध्ययनरत माध्यमिक बिद्यालयस्तरका १÷१ छात्र र छात्रा सहभागी गराइने छ ।
पत्रकार सम्मेलनमा वितरीत विज्ञप्तिमा “मेरो सोचाई र रोजाइका बाआमा”, “मैले खोजेको र रोजेको शिक्षक” तथा “म र मेरो मनोविज्ञान मैत्री विद्यालय” शिर्षकमा व्यवहारिक वक्तृत्वकला हुने जनाइएको छ ।
पत्रकार सम्मेलनमा उपस्थित कञ्चनरुप नगरपालिकाका नगर प्रमुख बसन्त मिश्रले आजका विद्यार्थीको मनोभाव बुझ्ने र शिक्षा क्षेत्रको विकासका लागि सुझावहरू संकलन गर्ने मनसायले प्रतियोगितात्मक कार्यक्रम गर्न लागिएको जानकारी दिए ।
नगर प्रमुखमा निर्वाचित भएपछि पहिलो पटक पत्रकार सम्मेलनमा देखा परेका नगर प्रमुख मिश्रले जनप्रतिनिधिको कुरा भन्दा काम गर्नुपर्नेमा जोड दिए । उनले शिक्षा, स्वास्थ्य, विकास, सुशासनमा जिल्ला र प्रदेशमै आफ्नो नगरपालिका उत्कृष्ठबाट पुरस्कृत भएकोमा खुशी व्यक्त गरे ।
अन्य स्थानीय तहमा एउटै पार्टीबाट निर्वाचित जनप्रतिनिधि खासगरी प्रमुख र उप–प्रमुखबीच कुटाकुटको स्थिति रहेकोमा आफ्नो नगरपालिकामा बहुमत अन्य पार्टीकै भएपनि आजसम्म सबै निर्णय र कामहरू सर्वसम्मतिमा भइरहेको उदाहरण पेश गरे ।
पार्टी र गुटभन्दा माथि उठेर काम गर्न चाहँदा विकास हुने भन्दै उहाँले असल कामका लागि साझा सोंच र प्रतिबद्धता आवश्यक रहेको बताए ।
शिक्षा, स्वास्थ्य र सुशासन स्थानीय तहसहित तीनै सरकारको उच्च प्राथमिकतामा नपरेसम्म मुलुकको विकास नहुने उनले दावी गरे । सुशासन कायम नभएसम्म दातृ निकायबाट प्राप्त अनुदान सहयोग मागी खाने भाँडो हुने तर विकास नहुने नगर प्रमुख मिश्रले बताए ।
क्षमतावान विद्यार्थी उत्पादनको कमीतर्फ चिन्ता व्यक्त गर्दै नगर प्रमुख मिश्रले कक्षा थपिए पनि स्थानीय तहले योग्य शिक्षक भर्ना गर्न पाउने अवस्था नरहेकोले बिद्यालयमा जनशक्तिको अभाव रहेको बताए । सहमतिमा शिक्षक स्थान्तरण, सरुवा र भर्नामा मात्र सबैको ध्यान केन्द्रित रहेकोमा उनले गुणस्तरीय शिक्षाका लागि आवाज उठनुपर्नेमा जोड दिए ।
परिषद्का सल्लाहकार बैद्यनाथ यादवले धन्यवाद ज्ञापन गरेको पत्रकार सम्मेलनमा नेपाल पत्रकार महासंघ सप्तरीका अध्यक्ष श्रवणकुमार देवसहित पत्रकारहरूको उपस्थिती रहेको थियो ।