न्यूज टुडे
राजविराज, १५ फागुन ।
सप्तरीको खडक नगरपालिका वडा नम्बर ३ स्थित रहेको जनहित पवन राष्ट्रिय प्रथामिक विद्यालय बनरझुल्लाका बहिरा तथा सुस्त मनिस्थिति भएका छात्रछात्राहरुलाई ब्याग, कपडा र शैक्षिक सामाग्री वितरण गरिएको छ । श्रीपुर्राज गैरसरकारी संस्था कुसहाको सहयोगमा उक्त सामाग्री वितरण गरिएको हो ।
विद्यालयमा अध्यानरत २३ जना छात्रछात्रालाई जनही १ थान ब्याग, १ दर्जन कपि, पेन्सिल, कपडा लगायतका शैक्षिक सामग्री वितरण गरिएको थियो । कार्यक्रममा संस्थाद्वारा सहयोग प्राप्त गरिव, बिपन्न र जेहेन्दार १ सय ७६ जाना बालबालिकाहरुलाई विद्यालय पोशाक समेत वितरण गरिएको विद्यालयले जनाएको छ ।
विद्यालय ब्यबस्थापन समितिका अध्यक्ष सुर्य नारायण चौधरीको अध्यक्षतामा आयोजित कार्यक्रममा विद्यालयलाई आ–आफ्नो क्षेत्रबाट सहयोग पु¥याउने आधा दर्जन ब्यक्तिहरुलाई सम्मान–पत्र, गम्छाबाट सम्मान गरिएको छ । सम्मानित हुनेहरूमा शिक्षा विकास तथा समवन्य कार्यालय सप्तरीका शिक्षा समवन्य अधिकारी विजय कुमार मण्डल, धर्मिहल्फा महिला विकास क्लब सप्तरीका अध्यक्ष समाजसेवी ईन्जिनियर सुर्य नारायण यादव, खडक नगरपालिका वडा नम्बर ३ का अध्यक्ष गमकलाल चौधरी, खडक नगरपालिका शिक्षा शाखा निवर्तमान प्रमुख देवन प्रसाद चौधरी, श्रीपुराजका टिम लिडर विनोदानन्द चौधरी रहेका छन् ।
विद्यालयका संस्थापक दाता विरेन्द्र कुमार चौधरीद्वारा संचालित कार्यक्रममा स्वागत सहायक प्रधानाध्यापक रुकमिणी चौधरीले गरेकी थिईन् भने कार्यक्रमको उद्देश्य तथा विद्यालयको समस्या र चुनौतीबारे प्रधानाध्यापक देव नारायण मण्डलले प्रकाश पारे ।