राजविराज, १५ साउन । घुस लिएको आरोपमा पक्राउ परेका भूमिसुधार तथा मालपोत कार्यालय, सप्तरीका नायव सुब्वा कृष्ण बल्लभ ठाकुर विरुद्ध अख्तियार दुरुपयोग अनुसन्धान आयोगले विशेष अदालत काठमाडौंमा आरोप–पत्र दायर गरेको छ।
ठाकुरले आफ्नो जिम्मेवारी र पदीय दायित्वसमेतको ख्याल नगरी बदनियतपूर्वक रकमको बार्गेनिङ गरी सेवाग्राहीसँग १३ हजार रुपैयाँ घुस लिएर भ्रष्टाचार निवारण ऐन, २०५९ को दफा ३ को उपदफा (१) को कसुर/अपराध गरेको देखिँदा बिगो १३ हजार कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (क) बमोजिम सजाय गर्न अख्तियारले माग गरेको छ ।
ट्रायल चेक गरी बढी जग्गाको श्रेष्ता कायम गरी दिने भन्दै सेवाग्राहीसँग १३ हजार घुस लिएको आरोपमा असार ३० गते ठाकुर पक्राउ परेका थिए । सेवाग्राहीको सूचना र उजुरीका आधारमा अख्तियार दुरुपयोग अनुसन्धान आयोगको कार्यालय इटहरीको टोलीले उनलाई पक्राउ गरेको प्रवक्ता तारानाथ अधिकारीले जानकारी दिए।