राजविराज, २४ जेठ । सप्तरीको बलान बिहुल गाउँपालिकामा शनिवार ७ जना संक्रमित भएसँगै कोरोना पोजेटिभ भएकाहरुको संख्या ७७ पुगेको छ ।
स्वास्थ्य कार्यालय सप्तरीका प्रमुख दुनियालाल यादवले दिएको जानकारी अनुसार पछिल्लो पटक बलान बिहुल गाउँपालिकामा ७ जनामा कोरोना पोजेटिभ आएसँगै संक्रमित संख्या ११ पुगेको छ । हालसम्मको प्राप्त विवरण अनुसार वर्साइन नगरपालिकामा २० जना, डाक्नेश्वरी नगरपालिकामा १२ जना, राजगढ गाउँपालिकामा १३ जना, हनुमाननगर कंकालिनी नगरपालिकामा ६ जना, राजविराज नगरपालिकामा ५, छिन्नमस्ता गाउँपालिकामा ५, शम्भुनाथ नगरपालिकामा १, विष्णुपुर गाउँपालिका १, तिरहुत गाउँपालिकामा १, राजगढ गाउँपालिका १, तिरहुत गाउँपालिकामा १, खडक नगरपालिका १ र सुरुङ्गा नगरपालिकामा १ जनामा कोरोना संक्रमणको पुष्टि भएको छ । कुल ७७ जना कोरोना संक्रमितहरुमध्ये ४ जना महिला रहेका छन् ।
स्वास्थ्य कार्यालयबाट खटिएको टोलीले विभिन्न क्वारान्टाइनहरुबाट स्वाब संकलन गरी परीक्षणकालागि धरान स्थित वि.पि.कोइराला स्वास्थ्य विज्ञान प्रतिष्ठानको कोभिड १९ परीक्षण प्रयोगशाला पठाईएको थियो । हालसम्म एक हजार ८ सय ४२ जनाको स्वाब संकलन गरी परीक्षण गराईएकोमा एक हजार ३ सय ९३ जनाको रिपार्ट नेगेटिभ आएको छ भने ७७ जनाको रिपोर्ट पोजेटिभ आएको छ । हालसम्म सप्तरीबाट एक हजार २ सय ८८ जनाको स्वाब परीक्षण भईसकेको स्वास्थ्य कार्यालयका प्रमुख यादवले जानकारी दिएका छन् ।