राजविराज, २८ चैत्र । लकडाउनका कारण पाकेको गहुँबाली काट्न किसानहरुलाई समस्या भईरहँदा सप्तरीको तिलाठी कोइलाडी गाउँपालिकाले सबैको गहुँबाली काट्ने जिम्मा लिएको छ ।
आठ ओटै वडामा लगाईएको सम्पूर्ण किसानको गहुँबाली मेसिनबाट निःशुल्क काट्ने प्रबन्ध मिलाईएको हो । पाकेको गहुँ खेतमै झर्न लागेको अवस्थामा गाउँपालिकाले जनताको पीडा बुझिदिएकोमा किसानहरुले खुशी व्यक्त गरेका छन् ।
कोमल देवी ठाकुरका अनुसार लकडाउनका कारण घरबाट निस्किन सक्ने अवस्था नरहेको तथा मजदूर समेत पाउन समस्या रहेकोले किसानहरुलाई गहुँबाली भित्र्याउने चिन्ता बढेको थियो । मेहनत र लगानी खेर जाने अवस्थामा जनप्रतिनीधिहरुले थालेको कार्य सराहनीय रहेको उनले बताईन् ।
गहुँ बाली काट्ने समस्या सम्पूर्ण किसानहरुको सामुहिक चिन्ताको विषय रहेकोले आफुहरुले गहुँबाली काटेर सहयोग गर्ने भावनाका साथ गहुँ काट्ने प्रबन्ध मिलाएको वडा अध्यक्ष गुलाब प्रसाद सिंहले बताए । आफुहरुले भ्याएसम्म जनताको दुःख पीडामा मलम लगाउने कार्य गरेको उनले प्रतिक्रिया दिए ।
यता गाउँपालिका अध्यक्ष सतिश कुमार सिंहले विपद्को अवस्थामा जनताको पीरमर्का जनप्रतिनीधिले बुझिदिनु स्वाभाविक भएकोले गाउँपालिकाकै खर्चमा सबैको गहुँबाली काट्ने व्यवस्था मिलाएको बताए । यसले गर्दा लकडाउनको समयमा किसानहरुलाई ठूलो सहयोग हुने उनले विश्वास व्यक्त गरे ।
तिलाठी कोइलाडी गाउँपालिकामा करिब एक हजार बिघामा गहुँबाली लगाईएकोमा करिब पाँच सय बिघा भन्दा बढी गहुँबाले खेतमै लागेको थियो छ । यसैसाता सम्पूर्ण किसानको गहुँबाली काट्ने कार्य सम्पन्न हुने अध्यक्ष सिंहले जानकारी दिए ।