राजविराज, ०८ चैत्र । राष्ट्रिय जनता पार्टी (राजपा) नेपाल जिल्ला कार्य समिति सप्तरीले सुरजित सिंह ‘गुड्डु’ लाई पार्टीबाट निष्कासन गरेको छ ।
पार्टीका जिल्ला संयोजक हरेराम यादवले शनिवार जारी गर्दै तिलाठी कोइलाडी गाउँपालिका वडा नम्वर ४ कोइलाडी निवासी सिंहलाई पार्टीबाट निष्कासन गरेका हुन् । विज्ञप्तिमा भनिएको छ, ‘सिंहले राजपाका केन्द्रिय अध्यक्ष मण्डललाई बद्नाम गर्ने गरी फोन टेपमा अनर्गल वक्तव्यवाजी गरेको प्रति जिल्ला अध्यक्ष मण्डलको गम्भिर ध्यानाकर्षण भएको छ ।’
पार्टीका केन्द्रीय अध्यक्ष मण्डलको चरित्र हत्या गर्ने गरी पार्टीको हित एवम् भावना विपरित सिंहको अभिव्यक्तिले सिंगो पार्टीलाई नै क्षति पुर्याएको विज्ञप्तिमा उल्लेख छ । पार्टीको जिल्ला अध्यक्ष मण्डलको शुक्रवार बसेको बैठकले पार्टी अनुशासन विपरित कार्य गरेको ठहर गर्दै सिंहलाई सोही मितिदेखि लागु हुने गरी पार्टीको साधारण सदस्यताबाट समेत निष्कासन गर्ने निर्णय गरिएको विज्ञप्तिमा जनाएको छ ।