राजविराज, २९ फागुन । सप्तरीको बोदे बरसाईन नगरपालिकामा बुधवार राति दुई स्थानमा चोरी भएको छ । तीन थान नागरिकताकासाथै नगद, गरगहना तथा सरसमान गरी करिब ४ लाख रुपैयाँ बराबरको चोरी भएको हो ।
वडा नम्वर २ बैरियाका विन्दुलाल साहले सञ्चालन गरेको ‘मिथलेश किराना पसल’को ताल्चा फुटाएर पसलमा रहेको नगद र सरसमान चोरी भएको छ । सञ्चालक साहका अनुसार पसलमा राखेको नगद २ लाख रुपैयाँ, ५ सय रुपैयाँ बराबरको रिचार्ज कार्ड, ६ लिटर नारियल तेल, १ काटुन विस्कुट, १२ पिस सावुनसहितका सरसमान चोरी भएको हो । 
यसैगरी वडा नम्वर ५ बरसाईन टोलमा रामसागर साहले इन्द्रनारायण यादवको घरमा सञ्चालन गरेको किराना पसलमा राखिएको नागरिकता, नगद, सुनको गहना चोरी भएको छ । पसलको ताल्चा फुटाएर साहका साथै उनकी आमा भुलकुनीया देवी तेलिन र पत्नी निर्मलादेवी साहको नागरिकता, स३प २०५० नम्वरको मोटरसाईकलको ब्लुबूक र लाइसेन्स, नगद ४७ हजार रुपैयाँ, डेढ तोलाको सुनको गहना लगायतका सरसमान चोरी भएको जनाएको छ ।
उता, ईलाका प्रहरी कार्यालय बोदे बरसाईनले घटनाबारे अनुसन्धान भईरहेको जनाएपनि स्थानीयहरुले भने नगर क्षेत्रमा रातिको समयमा गस्ती नहुँदा चोरीका घटना बढेको आरोप लगाएका छन । यसअघि गत १९ गते आइतवार पनि सोही नगरपालिका वडा नम्वर ५ मुख्य बजारमै मिथिलेशकुमार यादवले सञ्चालन गरेको ‘यधुराज ट्रेडर्स सुन चाँदी’ पसलबाट मोवाइल चोरी भएको थियो । सो चोरीका घटना घटाइएका व्यक्ति पसलमा रहेको सीसीटिभीमा कैद भएपनि प्रहरीले उनलाई पक्राउ भने गर्न सकेको छैन ।