उमेशकुमार साह
राजविराज, ०६ फागुन । सप्तरीको बोदे बरसाईन नगरपालिकामा मङ्गलवार विहान सडक दुर्घटना हुँदा एक जना भारतीय नागरिकको मृत्यु भएको छ भने दुर्घटनामा एक दर्जना व्यक्ति घाइते भएका छन ।
बोदे बरसाईन–विसनपुर सडकखण्ड अन्तर्गत वडा नम्वर २ बैरियाँस्थित दक्षिततर्फ गईरहेको ना १ च ५५२७ नम्बरको ट्रिपरले विपरित दिशाबाट आउँदै गरेको स १ प ३७९५ नम्बरको टेम्पोलाई ठक्कर दिँदा दुर्घटना भएको हो । दुर्घटनामा टेम्पोमा सवार विहार राज्यको अररिया जिल्लाको मटीयारीका २६ वर्षीय मो.सदाम हुसेनको मृत्यु भएको डिएसपी तिलक भारतीले जानकारी दिए ।
विहार राज्यको अररिया जिल्लाको मटीयारीका मो. बाजुदिन, आहमदावादका ३२ वर्षीय मो. फुलतान घाइते भएका छन । यसैगरी, सप्तरीको महादेवा गाउँपालिका वडा नम्वर १ का ४० वर्षीय मो. सलिमउद्दिन, १२ वर्षीय मो.अख्तर, १० वर्षीय मो.दविल, ६ वर्षीय मो. आशिक, ३५ वर्षीया मुनिया खातुन र सोही ठाउँका ९ वर्षीय मो. अनबर घाइते भएको प्रहरीले जनाएको छ ।
उनीहरु सवैको अवस्था समान्य रहेपनि नाम खुल्न नसकेकी करिब ४५ वर्षीया मुस्लिम समूदायकी एक महिलाको दुर्घटनामा परेर टाउको फुटेको छ । उनको अवस्था चिन्ताजनक रहेकोले उपचारकोलागि विराटनगरस्थित न्युरो अस्पताल पठाइएको प्रहरीले जनाएको छ । यसैगरी, मो.अख्तरको पनि अवस्था गम्भिर रहेको छ भने अन्य समान्य घाइतेहरुलाई उपचारकोलागि पठाइएको छ ।