राजविराज, ३० जेठ । सप्तरीको राजविराज नगरपालिका वडा नम्वर–५ (साविक वडा नम्वर–८) निवासी शिक्षा क्षेत्रका वौद्धिक व्यक्तित्व कुमार पाठकको सोमवार राती निधन भएको छ ।
बिराटनगर स्थित नोबेल मेडिकल कलेजमा उपचारको क्रममा हृदयघात भएर राती १.३० बजेको समयमा ५६ वर्षको उमेरमा निधन भएको हो । राजविराज स्थित आफ्नै घरमा खाना खाएर सुतेका पाठकलाई स्वास्थ्यमा समस्या देखिएपछि तत्कालै एम्बुलेन्समा राखेर नोबेल मेडिकल कलेजमा भर्ना गरिएको थियो । जिल्लाकै चर्चित विद्यालय दुर्गा सेकेण्ड्री स्कूलका संस्थापक प्रिन्सिपल समेत रहेका उनी निजी तथा आवासीय विद्यालय सङ्गठन (प्याव्सन) सप्तरीको जिल्ला अध्यक्ष हुँदै केन्द्रीय सदस्य समेत भएका थिए । 
सामाजिक गतिविधिमा समेत सक्रिय रहँदैआएका पाठक सप्तरी सामुदायिक सेवा केन्द्रका अध्यक्ष रहेर विकृति विसङ्गती विरुद्ध सचेतना, जागरण, दैवीप्रकोपबाट प्रभावितलाई राहत सहयोग तथा रक्तदान लगायतका कार्यक्रमलाई तिब्रता दिएका थिए । मैथिली साहित्य परिषद्का आजीवन सदस्य समेत रहेका उनले मैथिली भाषाको प्रचार–प्रसारका साथै भाषिक एव्म सांस्कृतिक अभियानलाई सहयोग पुर्याउँदैआएका थिए । लायन्स क्लवको सदस्य समेत रहेका शिक्षा क्षेत्रका विशिष्ठ व्यक्तित्व पाठक विगत केही वर्षदेखि मधेश आन्दोलनमा प्रत्यक्ष तथा अप्रत्यक्ष रुपमा सहयोग समेत पुर्याउँदैआएका थिए । प्रखर वौद्धिक व्यक्तित्वको रुपमा चिनिएका जनप्रिय पाठकको शव विहान भारत विहारको मन्सापुर स्थितको पुख्र्यौली घर अन्तिम संस्कारकालागि लगिएको छ ।
उनका एक पत्नी र तीन छोरा रहेको छ । उनको जेठा छोरा अमितले दागवती दिने पारिवारिक श्रोतले जनाएको छ । पाठकले सामाजिक सञ्जालमार्फत समेत आफ्ना अभिमतहरु निरन्तर रुपमा अभिव्यक्त गर्दैआएका थिए । उनले निरन्तर चलाउँदैआएको आफ्नो फेसबुकमा आइतवार राती २.२७ बजे अन्तिम स्टाटस लेखेका छन् । उक्त स्टाटसमा मधेश सबैकालागि चलखेल गर्ने थलोमा परिणत हुँदैछ । अधिकारसम्पन्न मधेश हेर्ने सपना यो जनममा पुरा नहुने भन्दै आफ्नो आयु समेत सानो रहेकोले सबैको मङ्गल होस् भनी कामना गरेको छ । उनले लेखेको अन्तिम स्टाटस पढ्दा शायद अब बाँच्दिन भन्ने कुरा आभास भईसकेको हुनसक्छ ।
सप्तरीका वौद्धिक व्यक्तित्व पाठकले आफ्नो फेसबुक स्टाटसमा यस्तो लेखेका छन्ः
वर्तमान परिस्थितिले मधेशको अवस्थालाइजूनकुराको भय थियो आखिर त्यही हुने भयो । अव फेरी मधेश सवैकालागि चलखेल गर्ने थलोमा परिणत हुने लगभग तय छ । अधिकार सम्पन्नभइ समृद्धिको वाटोमा लागेका मधेशलाइ हेर्ने सपना अव यो जनममा पूरा हुने भयेन त्यसै पनि मेरोआयू सानो छ । सवैको मङगल होस ।
