राजविराज, ३० जेठ । संविधान संशोधन तथा स्थानिय तहको संख्या थप गर्नुपर्ने माग गर्दै राष्ट्रिय जनता पार्टी नेपालले आह्वान गरेको बन्दका कारण मङ्गलवार सप्तरीको जनजीवन पूर्ण रुपमा प्रभावित भएको छ ।
राजपाका नेता तथा कार्यकर्ताहरुले जिल्लाको सदरमुकाम राजविराजमा विहानैदेखि प्रदर्शन जारी राखेका छन् । उनीहरुले गजेन्द्र चौक, शहिद दशन चौक लगायतका स्थानहरुमा टायर बालेर प्रदर्शनलाई निरन्तरता दिएका छन् ।
बन्दका कारण राजविराजबाट लामो तथा छोटो दुरीका कुनै पनि सवारी साधन चल्न सकेको छैन । उद्योगधन्दा, शिक्षण संस्था, सरकारी कार्यालय, वित्तीय संस्थासमेत पूर्ण रुपमा ठप्प रहेको छ । बजारमा सर्वसाधारणको चहल–पहल समेत न्यून देखिएको छ ।
यता पूर्व–पश्चिम लोकमार्गमा समेत भारदह, बरमझिया, कञ्चनरुप, महुली, रुपनी, कठौना, कल्याणपुर लगायतका स्थानहरुमा आन्दोलनकारीहरुले यातायात अवरुद्ध गरेका छन् । राजमार्गमा सयौं सवारी साधनहरु थन्किन पुगेको छ । 
