अश्विनी कोइराला
सन् १९८४ ताकाको कुरा हो, नेपालका एक धनाढ्य व्यक्ति (पदमसिंह राणा) कामको शिलशिलामा अमेरिका पुगेका रहेछन् । राणा अमेरिका पुग्दा त्यहाँका अखवारहरुमा अनौठा समाचार देखेर छक्क परेछन् ।
भएछ के भने, चर्चित आध्यात्मिक गुरु रजनिसले अमेरिकी सरकारलाई भद्र अवज्ञा गरिरहेका रहेछन् । भारतमा जन्मे हुर्केका र संसारलाई आफ्नो तर्क र विचारले छक्क पारेका ओशो रजनिसका कारण अमेरिकी राष्ट्रपति रोनाल्ड रेगन ठूलो तनाबमा परेका रहेछन् । अमेरिका पुगेर आफ्ना भक्तहरुको सहयोगमा रजनिसपूरम नामक सहर बसालेर उनले संसारलाई कम्युनको नौलो दर्शन दिइरहेका रहेछन् । अखवारहरुले ओशोका कुराहरु सनसनी बनाएर छाप्दा रहेछन् ।
नेपाली भए पनि राणाको घर देहरादुन पनि हो । नेपाल उतिसारो नचिन्ने हुनाले उनले अमेरिकामा आफू भारतबाट आएको भन्दा रहेछन् । भारतबाट आएको भन्ने वित्तिकै सबैले अमेरिका आएर रजनिसले के गर्न खोजेको भनेर चासो राख्दा रहेछन् । सबैले चासो दिएपछि राणालाई पनि गुलावी सहर बनेको रजनिसपुरम पुग्न मन लागेछ ।
उनी त्यहाँ पुग्दा पूरै सहर ओशो सन्यासीले भरिएको रहेछ । सन्यासी भेषमा हजारौं हजार नरनारीहरु आ–आफ्नो काममा व्यस्त थिए । कोही खेतीपाती गर्दै थिए । कोही बन्द–व्यापारमा व्यस्त थिए । कोही सफाइ गर्दै थिए । १९ देखि ४० वर्षबीचका युवा–युवतीले सम्पूर्ण सहर भरिएको देख्दा उनी छक्क परेछन् र रजनिस आश्रमतिर लागेछन् ।
रजनिसको आश्रममा सफाइमा मानिस दत्तचित्त भएर लागिरहेका थिए । प्रवचनको कार्यक्रम सुरु हुन थालेपछि सहरका सबै मानिस आश्रममा भेला हुँदा रहेछन् । त्यसका लागि ठूलो तयारी चलिरहेको रहेछ । सफाइ हेर्दै राणा ट्वाइलेट तिर लागेछन् । ट्वाइलेटमा पनि सफाइ चलिरहेको थियो । उनको आँखा ट्वाइलेट सफा गर्दै गरेको एउटा व्यक्तिमा गएर अडियो । उनले ती व्यक्तिलाई ध्यान दिएर हेरे । ती चिनेका व्यक्ति झैं लागे तर उनी को थिए, ठम्याउन सकेनन् ।
