प्रहरीको गोलीबाट एक जनाको मृत्यु, दुई दर्जन घाइते, आधा दर्जनको अवस्था चिन्ताजनक

राजविराज, २३ फागुन । नेकपा एमालेले आयोजना गरेको मेची महाकाली राष्ट्रिय अभियान विरुद्ध प्रदर्शन गर्ने क्रममा सोमवार साँझ प्रहरीको गोलीबाट एक जनाको घटनास्थलमै मृत्यु भएको छ ।
प्रहरीको गोलीबाट सप्तरीको मलेठ गाउँ विकास समिति वडा नम्वर–२ का अन्दाजी २५ वर्षीय सन्जन मेहताको मृत्यु भएको हो । टाउकोमा गोली लागेका मेहताको तत्कालै घटनास्थलमै मृत्यु भएको छ । एमाले अध्यक्ष केपी शर्माले ओलीले अभियानको सम्बोधन गरिरहेको अवस्थामा मोर्चाका कार्यकर्ताले औद्योगिक क्षेत्र बाहिर प्रदर्शन गर्ने क्रममा प्रहरीले सयौं राउण्ड अश्रु ग्यास तथा गोली फायर गरेका छन् ।
प्रहरीको गोलीबाट करिब दुई दर्जन भन्दा प्रदर्शनकारी घाइते भएका छन् । घाइतेहरुमध्ये आधा दर्जनको अवस्था चिन्ताजनक रहेको छ । गम्भीर घाइते भएकाहरुलाई धरान स्थित विपी कोइराला स्वास्थ्य विज्ञान प्रतिष्ठान धरान पठाईएको छ ।