उत्तम आचार्य
कञ्चनरूप, २६ मंसिर ।
पूर्व पश्चिम राजमार्ग अन्तर्गत सप्तरीको कञ्चनरूप नगरपालिका वडा नम्बर ८ बेरियर चोक स्थित चार्जिङ स्टेशन अगाडी शुक्रवार यात्रु बाहक बसको ठक्करबाट एक साइकल यात्रीको मृत्यु भएको छ । दुर्घटनामा तत्काल नाम थर वर नखुलेको अन्दाजी बर्ष ४८ को पुरुष व्यक्तिलाई ठक्कर दिएको हो ।
काँकडभिट्टाबाट हटौडा तर्फ आउँदै गरेको प्र१-०१-००१ ख ४१०६ नं. को यात्रुबाहक बसले बिपरित दिशाबाट जादै गरेको साईकलयात्रीलाई ठक्कर दिदा गम्भीर घाइते भएका पुरुषको गजेन्द्र नारायण सिंह अस्पताल राजबिराजमा उपचारको क्रममा मृत्यु भएको इलाका प्रहरी कार्यालय कञ्चनपुरले जनाएको छ ।
शरिरको बिभिन्न भागमा चोट लागि स्थानिय धर्मेश्वर अस्पताल ठेलिया सप्तरीमा प्राथमिक उपचार पश्चात थप उपचारको लागि गजेन्द्र नारायण सिंह अस्पताल राजबिराज पठाईएको थियो ।
घटना सम्बन्धमा थप अनुसन्धान भइरहेको तथा मृतकको पहिचान गर्ने कार्य भइरहेको इलाका प्रहरी कार्यालय कञ्चनपुरका प्रमुख प्रहरी नायव उपरीक्षक माधव प्रसाद काफ्लेले जानकारी दिए ।
