राजविराज, ११ असोज। जिल्ला प्रशासन कार्यालय सप्तरीले आवश्यक्ता र औचित्यका आधारमा मात्र सेवाग्राहीलाई पठाउन स्थानीय तह र वडा कार्यालयहरुलाई आग्रह गरेको छ ।
जिल्ला प्रशासन कार्याका एक जना कर्मचारीको कोरोनाका कारण मृत्य तथा अन्य केहि कर्मचारीहरु समेत संक्रमित भई न्यून जनशक्तिवाट कार्यालयको काम सम्पादन गर्नु पर्ने र वर्तमान अवस्थाका कारण सेवाग्राहीलाई समेत स्वास्थ्य सम्वन्धि समस्या पर्न सक्ने संकेत गर्दै कार्यालयले यस्तो आग्रह गरेको हो ।
कार्यालयले असोज ९ गते जारी गरेको सूचनामा सेवाग्राहीको स्वास्थ्य सुरक्षासमेतलाई ध्यानमा राखेर सिफारिस गर्न आग्रह गर्दै स्वास्थ्य सुरक्षा सतर्कता सम्वन्धि मापदण्ड पालना गर्न अनुरोध गरिएको छ ।
कार्यालयले सर्तसहित नयाँ नागरिक्ता र प्रतिलिपी नागरिक्ता वितरणको काम पनि सुरु गरेको छ । जनशक्ति र कोरोना संक्रमणको जोखिमलाई मध्येनजर गरी स्थानीय तहअनुसार साताको एक दिन काम गर्ने निर्णय भएको जिल्ला प्रशासन कार्यालयका सुचना अधिकारी आनन्द ठाकुरले जानकारी दिए ।
आईतवार शम्भुनाथ, सुरुङ्गा र डाकनेश्वरी नगरपालिका, सोमवार रुपनी र तिरहुत गाउँपालिका तथा खडक नगरपालिका, मंगलवार हनुमाननगर कंकालिनी नगरपालिका र महदेवा गाउँपालिका, वुधवार तिलाठि कोईलाडि र छिन्नमस्ता गाउँपालिका, विहिवार राजविराज नगरपालिका र राजगढ गाउँपालिका तथा शुक्रवार अग्निसाईर कृष्णासवरण र विष्णुपुर गाउँपालिकाको कार्य सम्पादन गरिने ठाकुरको भनाई छ ।
सप्तकोशी र कञ्चनरुप नगरपालिकाको इलाका प्रशासन कार्यालय कञ्चनपुर तथा वोदेवरसाईन नगरपालिका र वलान विहुल गाउँपालिकाको काम इलाका प्रशासन कार्यालय वोदेवरसाईनवाट नै भईरहेको पनि ठाकुरले जानकारी दिए ।
