राजविराज, १ असार । सप्तरी जिल्लाको विभिन्न स्थानीय तहहरुबाट आएका कोरोना भाइरसबाट संक्रमित भएकाहरु निको भएर घर फर्किने क्रमले तीब्रता पाएको छ ।
राजविराज स्थित साईकृष्णा अस्पतालमा भर्ना भएकाहरुमध्ये पछिल्लो पटक सोमवार १३ जना निको भएर डिस्चार्ज भएका छन् । जसमध्ये एक महिला रहेका छन् । योसँगै हालसम्म सप्तरी जिल्लामा कोरोना भाइरसलाई जित्न ५२ जना सफल भएका छन् । कोभिड–१९ कोरोना भाइरस व्यवस्थापन समितिका संयोजक डा. रणजित कुमार झाले जानकारी दिएका छन् । उनका अनुसार जिल्लाको विभिन्न स्थानीय तहहरुबाट कोरोना संक्रमित भई आएकाहरुमध्ये हालसम्म १, ३, १७, १८ र सोमवार १३ जना समेत गरी ५२ जना निको भएर खुशी हुँदै घर फर्केका छन् ।
गजेन्द्रनारायण सिंह अस्पताल र साइकृष्णा अस्पताल समेत गरी हालसम्म १ सय ३९ जना भर्ना भएकोमा अहिले ८७ जना उपचारको क्रममा रहेको छ । चिकित्सक जितेन्द्र कुमार यादवसहित स्वास्थ्यकर्मीहरुको रेखदेखमा नेपाली सेनाको व्यवस्थापकीय सहयोग रहेको छ ।
आइसोलेसनमा रहेर निको भई घर फर्किन लागेका व्यक्तिहरुलाई अस्पतालका डा. झासहित आइसोलेसनका स्वास्थ्यकर्मीहरुले फूलको गुच्छा र अबीर लगाएर विदाई गरेका छन् ।