राजविराज, २५ मंसिर । ‘सरसफाई तपाईको हातमा हामी युवा तपाईको साथमा’ भन्ने नारासहित सप्तरी युथ नेपालद्वारा शुरु गरिएको सरसफाई अभियानले १५ हप्ता पूरा गरेको छ ।
अभियानको १५ औं हप्ता राजविराज हटियाको पश्चिमपट्टीको गल्ली सफाई गरिएको छ । स्थानीयहरुले घेराबेरा गरी फोहोर फ्याँक्ने गरेको उक्त गल्लीलाई पूर्ण रुपमा सरसफाई गरिएको छ । स्थानीयहरुले घेराबेरा गरेकोलाई भत्काउँदै युवाहरुले गल्ली हिंडडुल गर्ने योग्य बनाएको छ ।
गल्लीमा आइन्दा फोहोर नगर्न युवाहरुले स्थानीयहरुलाई सचेत गराएका छन् । गल्लीमै एक जनाको घरको पाइप फुटेर पानी चुहिरहेका कारण उनलाई पनि चाँडै यसको मर्मत गर्न सुझाएको सप्तरी युथ नेपालका सदस्य नन्दकिशोर गुप्ताले बताए । १५ हप्ताको सरसफाईमा सहायक प्रमुख जिल्ला अधिकारी रामेश्वर अर्याल, जिल्ला प्रहरी प्रमुख एसपी दिवेश लोहनीसहित प्रहरीले समेत सहभागिता जनाएका छन् ।