न्यूज टुडे
राजविराज,२३ फागुन ।
प्रतिनिधिसभा सदस्य निर्वाचनको मतगणनामा सप्तरी निर्वाचन क्षेत्र ३ मा राष्ट्रिय स्वतन्त्र पार्टीले अग्रता लिएको छ । जसपा नेपालका उम्मेदवारलाई पछि पार्दै रास्वपाले अग्रता लिएका छन् । शनिबार ०१ :०० बजे सम्मको मतपरिणाम अनुसार ४ वटै निर्वाचन क्षेत्रमा रास्वपा उम्मेदवारहरु अग्रस्थानमा रहेका छन् ।
सप्तरी ३ मा रास्वपाका चौधरीले २ हजार ४ सय ८ मतले जसपा नेपालका यादवलाई पछि पारेका छन् ।
पछिल्लो मत परिणाम अनुसार सप्तरी निर्वाचन क्षेत्र नम्बर ३ मा राष्ट्रिय स्वतन्त्र पार्टीका उम्मेदवार अमरकान्त चौधरीले अग्रता लिएका छन् । उनले १० हजार २७ मत प्राप्त गरेका छन् । उनका निकटतम प्रतिस्पर्धी जसपा नेपालका उम्मेदवार उपेन्द्र यादव पछ्याउँदै छन् । उनले हालसम्म ७ हजार ६ सय १९ मत पाएका छन् भने नेपाली काँग्रेसका दिनेश यादवले ४ हजार ८९ मत प्राप्त गरेका छन् ।
विष्णुपुर गाउँपालिका राजगढ गाउँपालिका र रुपनीका १ र २ वडाको मतगणना सकिदा अमरकान्तले अग्रता कायम गरेका हुन् । यसअघि विष्णुपुर १,२ र ३ नम्बर वडाको मतगणना सकिदा यादव अगाडि थिए ।
यसैगरी एमालेका ताराकान्त चौधरी १ हजार ७ सय ९१ जनमत पार्टीका सुरेन्द्र मधेसीले ९ सय ९६, ,नेपाली कम्युनिस्ट पार्टीका अरुण कुमार साहले ५ सय ६६ मत प्राप्त गरेका छन् ।
चारवटै निर्वाचन अधिकृतको कार्यालयबाट प्राप्त जानकारी अनुसार सप्तरी निर्वाचन क्षेत्र नम्बर १ मा रास्वपाका उम्मेदवार पुष्पा चौधरी, क्षेत्र नम्बर २ मा रास्वपाका उम्मेदवार रामजी यादव र क्षेत्र नम्बर ४ मा रास्वपाका उम्मेदवार सिताराम साहले अग्रस्थान कायमै राखेका छन् ।
यस पटक सप्तरीका चारै निर्वाचन क्षेत्रमा विभिन्न राजनीतिक दल तथा।स्वतन्त्र गरी कुल १ सय १ जना उम्मेदवार चुनावी प्रतिस्पर्धामा छन् । निर्वाचन आयोगका अनुसार जिल्लाभर करिब ६८ प्रतिशत मत खसेको जनाएको छ ।
हाल सबै निर्वाचन क्षेत्रमा मतगणना कार्य जारी रहेको शनिबार राती सम्म अन्तिम परिणाम आउने निर्वाचन अधिकृतको कार्यालयले जनाएको छ ।