न्यूज टुडे
राजविराज, ०४ कार्तिक ।
सप्तरीमै ख्यातिप्राप्त श्री जनचेतना ४१औं रनिङ शिल्ड फुटबल प्रतियोगिताको दोश्रो दिनको शुक्रबार सम्पन्न खेलमा अग्निसाईर फुटबल क्लव सितापुर सप्तरीले जित हाँसिल गरेको छ । अग्निसाईर कृष्णासवरन १ स्थित जनचेतना माध्यमिक विद्यालयको खेलमैदानमा आयोजित दोश्रो दिनको खेलमा एपीएफ फुटबल टिम महोत्तरीलाई ०–५ गोलले पराजित गर्दै सप्तरीले जित हासिल गरेको हो ।
खेलको पहिलो हापको २० औं मिनेटमा अग्निसाईर फुटबल क्लब सितापुर सप्तरीका कृपा चौधरीले गोल गरे । यसैगरी विजेता टिमका अजित कुमार चौधरीले खेलको पहिलो हापमै ४० औं मिनेटमा गोल गर्दै टिमलाई अगाडि बढाए । यस्तै खेलको दोश्रो हापको ७२ औं मिनेटमा अग्निसाईरकै अभिषेक लिम्बुले १ गोल थपे भने ८० र ८५ औं मिनेटमा दिनेश राईले २ गोल प्रहार गरी टिमको जित सुनिश्चित गरे ।
खेलमा एपीएफ फुटबल टिम महोत्तरीले कुनै गोल नगर्दा लज्जास्पद हार व्यहोर्नुपरेको आयोजक समितिका शेखर गुप्ताले जानकारी दिए । भोली शनिबारको खेल फ्युजन एफ सि क्लब गाईघाट उदयपुर र महुली ११ स्पोर्ट्स क्लब घोघिदाहा भवानीपुर सप्तरी बीच हुने आयोजक समितिका अध्यक्ष सत्यनारायण चौधरीले जानकारी दिए । प्रतियोगितामा प्रदेश नम्बर १ का मोरङ, सुनसरी, उदयपुर र मधेश प्रदेशका महोत्तरी, सिराहा र सप्तरीका फुटबल टिमले सहभागीता जनाएको आयोजकले जनाएको छ ।
प्रतियोगिताको समूह (क) विराटनगर स्पोर्ट्स एकेडेमी विराटनगर मोरङ, न्यू त्रियुगा स्पोर्ट्स क्लब फत्तेपुर सप्तरी, अग्निसाईर फुटबल टिम वडा नम्बर २ सितापुर, ए.पी.एफ. फुटबल टिम वर्दिवास महोत्तरी बीच प्रतिस्पर्धा हुने छन् । यसैगरी समूह (ख) अन्तर्गत फ्यूजन एफ.सी. क्लब गाईघाट उदयपुर, महुली ११ स्पोर्ट्स क्लब घोंघिदाहा–भवानीपुर सप्तरी, रियल स्टार एफ.सी. सिरहा र रामधुनी यूवा क्लब झुम्का सुनसरी बीच प्रतिस्पर्धा हुने आयोजक समितिका सचिव महेश प्रसाद चौधरीले जानकारी दिए ।
८ टिम सहभागी खेलमा त्रियुगा स्पोर्ट्स क्लब फत्तेपुर र एपीएफ फुटबल टिम बर्दिवास महोत्तरी बाहिरिएका छन् । प्रतियोगितामा विजेता टिमलाई ५५ हजार नगद राशीसहित शिल्ड, मेडल, प्रमाण–पत्र प्रदान गरिने छन् भने उपविजेतालाई ३५ हजार नगद राशीसहितको कप, मेडल, प्रमाण–पत्रद्वारा पुरस्कृत गरिने आयोजकले जनाएका छन् ।