न्यूज टुडे
राजबिराज, १५ कार्तिक ।
युवा शक्ति क्लब बिष्णुपुर ६ द्वारा सप्तरीको राजबिराजमा संचालित तेस्रो मिथिला कप क्रिकेट प्रतियोगिताको उपाधि यूनाइटेड क्रिकेट क्लब पर्साले हात पारेको छ । राजबिराजस्थित मविव क्याम्पसको खेल मैदानमा सोमबार सम्पन्न फाईनल खेलमा छिन्नमस्ता स्पोर्ट्स क्लब बरहीबिरपुर सप्तरीलाई ५९ रनले पराजित गर्दै पर्साले जित हासिल गरेको हो ।
जितसँगै यूनाइटेड क्रिकेट क्लब पर्साले १ लाख रुपैया पुरस्कार प्राप्त गरेका छन् । टस हारेर ब्याटिङ्गमा उत्रिएका पर्साले निर्धारित २० ओभरमा ७ बिकेट गुमाउँदै १ सय ६१ रनको योगफल तयार पारे । पर्साका लागि सन्तोष कार्कीले सर्वाधिक ३९, सैफअलि हवारीले ३३, नरेश गिरले २७ र ईमरान शेखले १८ रनको योगदान गरे ।
बलिङ्गतर्फ सप्तरीका उपेन्द्र रायले ३ महबुव आलम र दिनेश अधिकारीले समान २÷२ बिकेट लिए । १ सय ६२ रनको तार्गेटको लक्ष्य लिएर मैदानमा उत्रेका छिन्नमस्ता स्पोर्ट्स क्लब बरहीबिरपुर सप्तरीले १८ दशमलव ५ ओभर खेल्दै १ सय २ रन मात्र लिन सफल भए । पर्साका लागि राजा मन्सुरीले ४, अल्ताफ मन्सुरीले ३ तथा नरेश गिरी र इमरान खानले १÷१ बिकेट लिए ।
खेलको म्यान अफ द म्याच राजा मन्सुरी घोषित भए, बेष्ट बलरमा रन्जितपुर राईडर्सका बिक्रान्त देव र बेष्ट ब्याडट्स म्यान पंकज देव घोषित भए । यस्तै उपबिजेता सप्तरीका आदिल अन्सारी म्यान अफ दि सिरिज घोषित भएका थिए । प्रतियोगिताका बिजेता तथा उपबिजेता टिमलाई एक समारोहका बीच पुरस्कार प्रदान गरिएको थियो ।
आयोजक समितिका अध्यक्ष रबिन्द्र यादवको अध्यक्षतामा आयोजित कार्यक्रममा कार्यक्रमका प्रमुख अतिथि प्रदेश नम्बर २ का अर्थ मन्त्री शैलेन्द्र प्रसाद साहले बिजेता टिमलाई नगद १ लाख, शिल्ड, कप प्रमाणपत्र प्रदान गरे । यसैगरी उपबिजेता टिमलाई राजबिराज नगरपालिकाका प्रमुख शम्भु प्रसाद यादव, बिष्णुपुर गाउँपालिकाका अध्यक्ष निलाम्बर यादवले नगद ५० हजार कप, मेडल र प्रमाणपत्र प्रदान गरे ।