न्यूज टुडे
राजबिराज, ३१ असोज ।
सप्तरीको अग्निसाईर कृष्णासवरन गाउँपालिका वडा १ घोंघिदाहामा संचालित जनचेतना ४०औं रनिङ्ग शिल्ड फुटबल प्रतियोगिताको उपाधी अग्निसाईर फुटबल टिम सितापुर सप्तरीले हात पारेको छ । जनचेतना माध्यमिक विद्यालय घोंघिदाहा भवानीपुरको खेलमैदानमा आइतबार सम्पन्न फाइनल खेलमा रामधुनी यूवा क्लव झुम्का सुनसरीलाई ० को विरुद्ध १ गोलले पराजित गर्दै सितापुर सप्तरीले उपाधीमाथि कब्जा जमाएको हो ।
दुबै टिम बीच कडा प्रतिस्पर्धा भएको खेलको पहिलो हाफमा कुनैपनि गोल हुन सकेन । खेलको दोस्रो हाफमा विजेता टिमका जर्सी नम्बर १४ का कृपा चौधरीले खेलको पन्ध्रऔं मिनेटमा गोल गरेका थिए । सोही गोल निर्णायक बनेका थिए । जनचेतना ४० औं रनिङ्ग शिल्ड फुटबल प्रतियोगिता आयोजक समितिका अध्यक्ष शम्भु प्रसाद चौधरीको अध्यक्षता आयोजित एक समारोहका बीच खेलका बिजेता तथा उपविजेता टिमलाई पुरस्कार बितरण गरिएको थियो ।
बिजेता टिमका खेलाडीहरुलाई कार्यक्रमका प्रमुख अतिथि प्रदेश नम्बर २ का सामाजिक बिकास मन्त्री नवल किशोर साहले नगद ५१ हजारसहित शिल्ड, प्रमाण–पत्र, मेडलसहितका प्रथम पुरस्कार बितरण गरे । यसैगरी उपबिजेता टिमलाई कार्यक्रमका बिशिस्ट अतिथि अग्निसाईर कृष्णासवरन गाउँपालिकाका उपाध्यक्ष मिना चौधरीले नगद ३५ हजार, कप, मेडल तथा प्रमाणपत्र प्रदान गरे ।
कार्यक्रममा सामाजिक बिकास मन्त्री साह, बिशिस्ट अतिथि मिना चौधरीले शुभकामना मन्तव्य व्यक्त गर्दै खेलाडीहरुको प्रगतिको कामाना गरे ।
अमरेन्द्र ठाकुरद्वारा संचालित कार्यक्रममा स्वागत खेलका संस्थापक अध्यक्ष राजदेव चौधरीले गरे ।