राजविराज, २१ साउन । सप्तरीमा गएराती मृत्यु भएका तीन मध्ये एक जनामा कोरोना संक्रमण पुष्टि भएको छ भने दुई जनाको रिपोर्ट नेगेटिभ आएको छ ।
रुपनी गाउँपालिका ५ का ४५ बर्षीय पुरुष, राजगढ गाउँपालिकाका ७१ बर्षीय पुरुष र मा डाक्नेश्वरी नगरपालिका ९ का ७४ बर्षीय पुरुषको गएराती मृत्यु भएको थियो । मिल्दो लक्षण देखिएका कारण तीनै जनाको मृत्यु कोरोनाका कारण भएको आशंका गरिएको थियो ।
तर, तत्कालै स्वाव परिक्ष गर्दा रुपनी – ५ का ४५ वर्षिय पुरुषको रिपोर्ट पोजेटिभ र अन्य दुई जनाको रिपोर्ट नेगेटिभ आएको जिल्ला स्वास्थ्य कार्यालय सप्तरीले जनाएको छ ।
रुपनी गाउँपालिका ५ गढियाका ४५ बर्षीय पुरुष डेढ महिना अघि मलेसियावाट फर्किएका थिए । गाउँपालिकाले उनलाई पिसिआर परिक्षण गर्न भनेपनि अटेर गर्दै आएका थिए । राजविराजमा गराउँछु भनेपनि उनले परिक्षण नै नगराई घरमै वसेको गाउँपालिका अध्यक्ष हरेराम यादवले जानकारी दिए ।
पछिल्लो समय ज्वरो, दम लगायतका समस्या देखिएपछि उनले नजिकैका मेडिकल पसलमा जाने र औषधी किनेर खाने गर्दै आएका थिए । दुई दिन अघि स्वासप्रस्वासमा समस्या वढेपछि राजविराज स्थित गजेन्द्रनारायण सिंह अस्पताल भर्ना गरिएको थियो ।
त्यहाँ उपचार सम्भव नभएपछि धरान स्थित विपी कोईराला स्वास्थ्य विज्ञान प्रतिष्ठान पुर्याएपछि उनको मृत्यु भएको गाउँपालिका अध्यक्ष यादवले वताए । परिवारका सदस्यले घरमा ल्याएर शव ब्यवस्थापनको तयारी गरिरहेका वेला गाउँपालिकाले नै हस्तक्षेप गरी स्वाव परिक्षण गराएको थियो । परिक्षणमा उनको रिपोर्ट पोजेटिभ आएको जिल्ला स्वास्थ्य कार्यालयका निमित्त प्रमुख दुनियाँलाल यादवले जानकारी दिए ।
स्वास्थ्य कार्यालयले उनको परिवारको स्वाव परिक्षणको तयारी गरेको छ भने सवैलाई होम क्वारेन्टाईनमा राखेको छ ।
यसैगरी, राजविराजस्थित छिन्नमस्ता अस्पतालमा उपचारकै क्रममा मृत्यु भएका राजगढ गाउँपालिकाका ७१ बर्षीय पुरुष र डाक्नेश्वरी नगरपालिका ९ का ७४ बर्षीय पुरुषको रिपोर्ट नेगेटिभ आएको यादवले वताए । उनीहरुको पनि आजै स्वाव संकलन गरी परिक्षण गरिएको थियो ।
यो सँगै सप्तरीमा कोरोनाका कारण मृत्यु हुनेको संख्या दुई पुगेको छ भने कोरोना संक्रमितको संख्या ५४० पुगेको छ। यसअघि गत साउन १ गते राजविराज ६ का ७३ वर्षिय ब्यापारीको कोरोनाका कारण मृत्यु भएको थियो । स्वासप्रस्वास लगायतका विभिन्न समस्या देखिएपछि विराटनगर हुँदै उनलाई धरान पुर्याईएको थियो । कोरोना रिपोर्ट पोजेटिभ देखिएको ३ घण्टा नवित्दै उनको मृत्यु भएको थियो । करिव दुई साताअघि उनी भारतको दरभंगावाट फर्किएर होम क्वारेन्टाईन भन्दै ब्यापारमा संलग्न थिए ।