राजविराज, २१ पौष । प्रहरीले सप्तरीमा अपराध न्यून गर्न थालेको विशेष अभियान अन्तर्गत एक दिनमै एक महिलासहित १७ जना फरार प्रतिवादीलाई पक्राउ गरेको छ ।
विभिन्न मुद्दामा अदालतबाट फैसला भई दोषी पाइएका तथा मुद्दा जारी रहेपनि फरार रहेकामध्ये एक महिलासहित १७ प्रतिवादीहरुलाई सोमवार पक्राउ गरिएको हो । जिल्ला प्रहरी कार्यालय राजविराजका अनुसार कुटपिटदेखि ज्यान मार्ने उद्योग मुद्दासम्मका प्रतिवादीहरुलाई पक्राउ गरिएको छ ।
अभियान अन्तर्गत बलान बिहुल गाउँपालिका वडा नम्वर ३ का ५४ वर्षीय जयराम साह, बोदे बरसाईन नगरपालिका वडा नम्वर ९ का ५७ वर्षीया झौली मण्डल, वडा नम्वर २ का ४७ वर्षीय महेन्द्र साह, वडा नम्वर २ कै ३८ वर्षीय राम सुन्दर यादव, सुरुङ्गा नगरपालिका वडा नम्वर ९ का ४० वर्षीय नरसिंह चौधरी, सोही वडाका फागु मण्डल र राजगढ गाउँपालिका वडा नम्वर २ का बलविर कुमार यादव कुटपिट मुद्दामा पक्राउ परेका छन् ।
यसैगरी बोदे बरसाईन नगरपालिका वडा नम्वर ९ का ४७ वर्षीय चन्देश्वर साह, खडक नगरपालिका वडा नम्वर ९ का महिनारायण चौधरी र वडा नम्वर ६ का नजबुद मियालाई लुटपाट मुद्दाका पक्राउ गरिएको प्रहरीले जनाएको छ ।
खडक नगरपालिका वडा नम्वर ४ का ५८ वर्षीय ईसराइल मियाँ र बोदे बरसाईन नगरपालिका वडा नम्वर १० का ५९ वर्षीय खगेन्द्र यादवलाई ज्यान मार्ने उधोग मुद्दामा पक्राउ गरिएको छ । यसैगरी खडक नगरपालिका वडा नम्वर ६ की संगिता कुमारी चौधरी र सोही वडाका बद्री चौधरीलाई जारी मुद्दामा पक्राउ गरिएको छ भने खडक नगरपालिका नम्वर ६ का राज कुमार साहलाई ठगी, सोही नगरपालिका वडा नम्वर ९ का अरुण कुमार चौधरीलाई लेनदेन, वडा नम्वर ९ कै सुखैर चौधरीलाई जालसाँझी मुद्दामा पक्राउ गरिएको जिल्ला प्रहरी कार्यालय राजविराजका डिएसपी तिलक भारतीले जानकारी दिएका छन् ।