राजविराज, २३ पुस । विगत एक सातायताको बढ्दो चिसोका कारण सप्तरी जिल्लाको जनजिवन कष्टकर हुनुका साथै मान्छे मर्ने क्रम बढेको भन्दै प्रदेश सभा सदस्य शैलेन्द्र प्रसाद साहले प्रधानमन्त्रीलाई ज्ञापन–पत्र पठाएका छन् ।
ग्रामिण क्षेत्रमा औषधीसहितको स्वास्थ्यकर्मीको टोली, सार्वजनिक स्थलहरुमा काठ दाउराको व्यवस्थापन गरि आगो बाल्ने कार्य सरकारी स्तरबाट हुनुपर्ने तथा पीडित परिवारलाई राहत उपलब्ध गराउन उनले माग गरेका हुन् । प्रमुख जिल्ला अधिकारी भागिरथ पाण्डेय मार्फत पठाईएको ज्ञापन पत्रमा गत असार साउनमा गएको विनासकारी बाढीको पीडावाट उम्किन नपाउदै एकसाता यताको शीतलहरले सप्तरीवासी नराम्ररी प्रभावित भएको जनाईएको छ ।
‘अत्यधिक रुपमा जाडो बढ्दै जानु तथा गरिब, दलित र विपन्न परिवारमा न्यानो कपडाको अभावले जाडो छल्न मुस्किल भईरहेको यथार्थतासँगै मेहनत मजदुरी गरि गुजारा गर्नेहरुका लागि अहिले संकट उत्पन्न भएको छ’ ज्ञापन पत्रमा अगाडि भनिएको छ ‘अत्यधिक शितलहरका कारण सप्तरी जिल्लामा मात्र शनिवार सम्म कम्तीमा ९ जनाको कठ्याग्रिंएर मृत्यु भईसकेको छ, मृत्यु भएका सबैजनाको परिवार अति नै विपन्न छन्, जाडोका कारण कैयौं विरामी परेका छन् ।’ खासगरि बृद्धबृद्धा र बालबालिकामा निमोनिया, कोल्ड डायरिया, रुघाखोकी, ज्वरो, दम लगायतका समस्या देखिन थालेको भन्दै शितलहरका कारण जिल्लामा अहिले घर वाहिर निस्कन समस्या भएको जनाईएको छ ।
कैयौं दिनदेखी घाम लाग्न नसकेको भन्दै प्रकृतिको यो प्रकोपवाट सप्तरी सहित मधेशका जिल्लाका नागरिकको दैनिकी कष्टपुर्ण बन्दै गएको ज्ञापन पत्र मार्फत उनले प्रधानमन्त्री देउवाको ध्यानाकर्षण गराएका छन् ।
जनताको गाँस, बास, कपास, शिक्षा र स्वास्थ्यको सुविधाको गारेन्टी सरकारले गर्ने कुरा संविधानमै उल्लेख भएको विषय भएको भन्दै शितलहरको यत्रो कहरका वावजुद सप्तरीका प्रभावित बस्तीमा अझैं पनि राज्यको जिम्मेवार उपस्थिति हुन नसकेको ज्ञापन पत्रमा उल्लेख छ । ‘जनतालाई सुरक्षित पार्न सकिए मात्र राज्यको उपस्थितिलाई बलियो मान्न सकिन्छ, त्यसर्थ पछिल्लो समय बढेको जाडोवाट बच्नकालागि गरिब, दलित र विपन्न बस्तीमा तत्काल न्यानो लुगाको व्यवस्था गर्न माग गर्दछु’ अगाडि भनिएको छ ‘जाडोका कारण मेहनत मजदुरी गर्न नपाई भोकभोकै बस्न विवश परिवारलाई उचित राहत प्रदान गर्न समेत आग्रह गर्दछु ।’