गठबन्धनले भव्यतापूर्वक मनाए रंगभेदी गिरफ्तारीको वार्षिकी

राजविराज, १० मंसिर । गतवर्ष मंसिर १० गते काठमाण्डौको सुन्धारा क्षेत्रबाट स्वतन्त्र मधेश गठबन्धनका संयोजक डा. सिके राउतसहित पाँच सय जनाभन्दा बढीलाई कालो रंगकै आधारमा गिरफ्तार गरेको दिनको स्मरण गर्दै गठबन्धनले सप्तरीसहित मधेशका जिल्लाहरुमा भव्यताका साथ वार्षिकी मनाएका छन् ।
स्वतन्त्र मधेश गठबन्धनको केन्द्रीय समितिको आह्वानमा विहीबार मधेससहित विभिन्न स्थानहरुमा शान्तिपूर्ण जुलुस तथा सभाको आयोजना गरिएको हो । रंगभेदी गिरफ्तारीको वार्षिकीका अवसरमा सयौंको संख्यामा सहभागी युवाहरुले गजेन्द्र चौकमा गठबन्धनको पोषाक र झण्डासहित जुलुस निकालेका छन् । ‘स्वतन्त्र मधेश अप्पन देश, मधेशमे मानव नरसंहार बन्द कर, नेपाली सेना फिर्ता कर’ सहितका नाराहरु लगाउँदै उक्त जुलुस राजविराजको विभिन्न भाग परिक्रमा पश्चात पुनः गजेन्द्र चौकमै पुगी सभामा परिणत भएको थियो ।
गठबन्धनका जिल्ला संयोजक सुरेन्द्र मधेशीको अध्यक्षतामा आयोजित शान्तिपूर्ण सभामा पूर्व सभासद् महेश प्रसाद यादव, मो. उस्मान, हरिनारायण साह, चन्द्रनारायण यादव, प्रभात कुमार साह, श्रवण शर्मालगायतले सम्वोधन गरेका छन् । यसै सप्तरीका वीपी मावि भारदहलगायतका स्थानहरुमा शान्तिपूर्ण प्रदर्शन तथा सभाको आयोजना गरिएको जानकारी प्राप्त भएको छ ।